an-jaana Dar

vālid se mai-kade meñ mulāqāt ho ga.ī

maiñ jis se Dar rahā thā vahī baat ho ga.ī

bazm-e-suḳhan meñ maiñ thā musalsal jagā rahā

thā zehn bhī hazal kī dhunoñ meñ phañsā huā

khānā milā thā shab na savere kā nāshta

bhūle se us ke ghar kī taraf maiñ chalā gayā

achchhī tarah se merī mudārāt ho ga.ī

maiñ jis se Dar rahā thā vahī baat ho ga.ī

kyā pūchhte ho daur-e-ġharībī kā mājrā

had se baḌhī jo bhuuk naqāhat se gir paḌā

dāman thā tār-tār garebāñ phaTā phaTā

us kī galī ke logoñ ne majnūñ samajh liyā

bachchoñ kī ek fauj mere saath ho ga.ī

maiñ jis se Dar rahā thā vahī baat ho ga.ī

afsos aarzū pe mirī os paḌ ga.ī

āḳhir vahī huā merī duniyā ujaḌ ga.ī

baat apnī kuchh banī to bahut kuchh bigaḌ ga.ī

vo ḳhud hī mujh se shādī na karne pe aḌ ga.ī

jiite mire raqīb mujhe maat ho ga.ī

maiñ jis se Dar rahā thā vahī baat ho ga.ī

kal raat jā paḌā maiñ achānak tilak nagar

the rāste meñ merī ka.ī sāliyoñ ke ghar

jalve bhī de sake na mujhe dāvat-e-nazar

jī chāhtā thā phūloñ kī barsāt ho magar

bad-qismatī se jūtoñ kī barsāt ho ga.ī

maiñ jis se Dar rahā thā vahī baat ho ga.ī

achchhī tarah jo ishq meñ barbād ho gayā

har ek qaid-e-fikr se āzād ho gayā

āḳhir ko mai-kade meñ hī ābād ho gayā

maiñ mādar-e-sharāb kā dāmād ho gayā

saarī hayāt nazr-e-ḳharābāt ho ga.ī

maiñ jis se Dar rahā thā vahī baat ho ga.ī

biivī ne merī mujh se kahā mere 'pāpular'

sher-o-suḳhan se dil na jalā mere 'pāpular'

hai vaqt ab bhī hosh meñ aa mere 'pāpular'

in shā.iroñ se ḳhud ko bachā mere 'pāpular'

phir shā.iroñ se raat mulāqāt ho ga.ī

maiñ jis se Dar rahā thā vahī baat ho ga.ī

walid se mai-kade mein mulaqat ho gai

main jis se Dar raha tha wahi baat ho gai

bazm-e-suKHan mein main tha musalsal jaga raha

tha zehn bhi hazal ki dhunon mein phansa hua

khana mila tha shab na sawere ka nashta

bhule se us ke ghar ki taraf main chala gaya

achchhi tarah se meri mudaraat ho gai

main jis se Dar raha tha wahi baat ho gai

kya puchhte ho daur-e-gharibi ka majra

had se baDhi jo bhuk naqahat se gir paDa

daman tha tar-tar gareban phaTa phaTa

us ki gali ke logon ne majnun samajh liya

bachchon ki ek fauj mere sath ho gai

main jis se Dar raha tha wahi baat ho gai

afsos aarzu pe meri os paD gai

aaKHir wahi hua meri duniya ujaD gai

baat apni kuchh bani to bahut kuchh bigaD gai

wo KHud hi mujh se shadi na karne pe aD gai

jite mere raqib mujhe mat ho gai

main jis se Dar raha tha wahi baat ho gai

kal raat ja paDa main achanak tilak nagar

the raste mein meri kai saliyon ke ghar

jalwe bhi de sake na mujhe dawat-e-nazar

ji chahta tha phulon ki barsat ho magar

bad-qismati se juton ki barsat ho gai

main jis se Dar raha tha wahi baat ho gai

achchhi tarah jo ishq mein barbaad ho gaya

har ek qaid-e-fikr se aazad ho gaya

aaKHir ko mai-kade mein hi aabaad ho gaya

main madar-e-sharab ka damad ho gaya

sari hayat nazr-e-KHarabaat ho gai

main jis se Dar raha tha wahi baat ho gai

biwi ne meri mujh se kaha mere 'papular'

sher-o-suKHan se dil na jala mere 'papular'

hai waqt ab bhi hosh mein aa mere 'papular'

in shairon se KHud ko bacha mere 'papular'

phir shairon se raat mulaqat ho gai

main jis se Dar raha tha wahi baat ho gai