appeal

umīd-vār thā 'vāhī' bhī membarī ke liye

ki shortcut hai yahī ik tavañgarī ke liye

magar ba-faiz-e-harīfāñ use ticket na milā

phañsā jo kohr-e-siyāsat meñ shortcut na milā

appeal board meñ pahūñchā to yuuñ shikāyat kī

huzūr kī na ga.ī qadar merī ḳhidmat kī

ye ḳhud-satā.ī nahīñ balki ye haqīqat-e-hāl

kisī harīf se kamtar nahīñ mire a.amāl

vo saare gun jo haiñ me.aar leaderī ke liye

vo saare vasf jo lāzim haiñ rahbarī ke liye

haiñ us ġhulām kī fitrat meñ is tarah maujūd

ki jaise duudh meñ chīnī ho aur taar meñ paud

avām-dushmanī pesha rahā hai muddat se

tamām-umr laḌā huuñ haqq-o-sadāqat se

mirī giraft meñ rahte haiñ sāda-lauh avaam

maiñ un ke naam ko kartā huuñ rāt-din nīlām

zabān-e-tez se taqrīr garm kartā huuñ

aur us kī aañch se lohe ko naram kartā huuñ

kabhī jo ḳhidmat-e-qaumī kā paar letā huuñ

to muflisoñ kī lañgoTī utaar letā huuñ

mirī sarisht meñ dāḳhil hai chor-bāzārī

mirī bahisht hai bāzār-e-hirs-o-makkārī

ḳhudā ke fazl se rāshan kā rozgār bhī hai

baseñ bhī chaltī haiñ ḳhādim ke paas car bhī hai

munāfe.a-ḳhor bhī huuñ aur sūd-ḳhār bhī huuñ

ḳhudā-parast bhī huuñ aur ḳhudā kī maar bhī huuñ

maiñ chor bhī huuñ Dakaitoñ kā sarġhana bhī huuñ

maiñ rahzanoñ kā moallim bhī rahnumā bhī huuñ

baḌī safā.ī se kar ke zaḳhīra-andozī

akaal meñ bhī manātā huuñ jashn fīrozī

ġharaz ki mamba.a-e-ausāf hai ye ḳhādim-e-qaum

ḳhudā ke vāste bhūleñ na us ko nāzim-e-qaum

umid-war tha 'wahi' bhi membari ke liye

ki shortcut hai yahi ek tawangari ke liye

magar ba-faiz-e-harifan use ticket na mila

phansa jo kohr-e-siyasat mein shortcut na mila

appeal board mein pahuncha to yun shikayat ki

huzur ki na gai qadar meri KHidmat ki

ye KHud-satai nahin balki ye haqiqat-e-haal

kisi harif se kamtar nahin mere aamal

wo sare gun jo hain mear leaderi ke liye

wo sare wasf jo lazim hain rahbari ke liye

hain us ghulam ki fitrat mein is tarah maujud

ki jaise dudh mein chini ho aur tar mein paud

awam-dushmani pesha raha hai muddat se

tamam-umr laDa hun haqq-o-sadaqat se

meri giraft mein rahte hain sada-lauh awam

main un ke nam ko karta hun raat-din nilam

zaban-e-tez se taqrir garm karta hun

aur us ki aanch se lohe ko naram karta hun

kabhi jo KHidmat-e-qaumi ka par leta hun

to muflison ki langoTi utar leta hun

meri sarisht mein daKHil hai chor-bazari

meri bahisht hai bazar-e-hirs-o-makkari

KHuda ke fazl se rashan ka rozgar bhi hai

basen bhi chalti hain KHadim ke pas car bhi hai

munafea-KHor bhi hun aur sud-KHar bhi hun

KHuda-parast bhi hun aur KHuda ki mar bhi hun

main chor bhi hun Dakaiton ka sarghana bhi hun

main rahzanon ka moallim bhi rahnuma bhi hun

baDi safai se kar ke zaKHira-andozi

akal mein bhi manata hun jashn firozi

gharaz ki mamba-e-ausaf hai ye KHadim-e-qaum

KHuda ke waste bhulen na us ko nazim-e-qaum