ba-majburi har ek ranj-o-mehan likhna paDa mujhko

ba-majbūrī har ik rañj-o-mehan likhnā paḌā mujh ko

banā kar ḳhud ko mauzū-e-suḳhan likhnā paḌā mujh ko

zabāneñ jin kī qaiñchī kī tarah chaltī thiiñ shauhar par

unheñ shīrīñ-zabāñ shīrīñ-dahan likhnā paḌā mujh ko

har ik mahfil meñ jalvoñ kī jo rishvat pesh kartī thiiñ

vo jaisī bhī thiiñ jān-e-anjuman likhnā paḌā mujh ko

mirī majbūriyoñ ne nāzukī kā ḳhuun kar Daalā

har ik gobhī-badan ko gul-badan likhnā paḌā mujh ko

jab ik alhaḌ banī dulhan kisī bosīda shauhar kī

to us ke surḳh joḌe ko kafan likhnā paḌā mujh ko

vo jin kī umr kī ghaḌiyāñ nihāyat sust chaltī haiñ

sanad se un kī paidā.ish kā san likhnā paḌā mujh ko

basā-auqāt hurmat bhī qalam kī daav par rakh dī

luTeroñ ko muhibbān-e-vatan likhnā paḌā mujh ko

haqīqat ye hai vo bachche na mujrim the na qātil the

to sab kā qissa-e-dār-o-rasan likhnā paḌā mujh ko

vo be-hañgam sī jin ko dekh kar maiñ tauba kartā thā

ba-majbūrī unheñ tauba-shikan likhnā paḌā mujh ko

bahut mushkil thā jin ko DhūñDnā make-up ke malbe se

so andāze se un kā bāñkpan likhnā paḌā mujh ko

ba-majburi har ek ranj-o-mehan likhna paDa mujh ko

bana kar KHud ko mauzu-e-suKHan likhna paDa mujh ko

zabanen jin ki qainchi ki tarah chalti thin shauhar par

unhen shirin-zaban shirin-dahan likhna paDa mujh ko

har ek mahfil mein jalwon ki jo rishwat pesh karti thin

wo jaisi bhi thin jaan-e-anjuman likhna paDa mujh ko

meri majburiyon ne nazuki ka KHun kar Dala

har ek gobhi-badan ko gul-badan likhna paDa mujh ko

jab ek alhaD bani dulhan kisi bosida shauhar ki

to us ke surKH joDe ko kafan likhna paDa mujh ko

wo jin ki umr ki ghaDiyan nihayat sust chalti hain

sanad se un ki paidaish ka san likhna paDa mujh ko

basa-auqat hurmat bhi qalam ki daw par rakh di

luTeron ko muhibban-e-watan likhna paDa mujh ko

haqiqat ye hai wo bachche na mujrim the na qatil the

to sab ka qissa-e-dar-o-rasan likhna paDa mujh ko

wo be-hangam si jin ko dekh kar main tauba karta tha

ba-majburi unhen tauba-shikan likhna paDa mujh ko

bahut mushkil tha jin ko DhunDna make-up ke malbe se

so andaze se un ka bankpan likhna paDa mujh ko