bak raha hun aaj kal hizyan baqi KHair hai

bak rahā huuñ aaj kal hizyān baaqī ḳhair hai

aur lāhaq hai zarā nisyān baaqī ḳhair hai

kaar mere yaar kī thī aur phir chorī kī thī

ho gayā hai chuuk meñ chālān baaqī ḳhair hai

ghaas bhī ugtī nahīñ hai baal bhī ugte nahīñ

ban gayā hai sar mirā maidān baaqī ḳhair hai

fikr kī to baat koī bhī nahīñ hai jān-e-jāñ

ghar meñ haiñ bas darjanoñ mehmān baaqī ḳhair hai

ek arsa ho gayā hai raat din thāne meñ huuñ

aur chhuTne kā nahīñ imkān baaqī ḳhair hai

jis kā bañgla dekh kar ghar-bār ko chhoḌā gayā

vo to yaksar ho ga.ī anjān baaqī ḳhair hai

bah rahī hai rāt-bhar se naak sar meñ dard hai

aur kuchh sunet nahīñ haiñ kaan baaqī ḳhair hai

saal se hai saas merī dākuoñ kī qaid meñ

māñgte haiñ vo baḌā tāvān baaqī ḳhair hai

hai zarā ḳhārish sī dādā-jān ko laqvā bhī hai

aur haiñ bīmār dādī-jān baaqī ḳhair hai

kal se hai bachchī ko haiza aur bachche ko buḳhār

sab se chhoTe ko huā yarqān baaqī ḳhair hai

baat ab tashvīsh kī koī nahīñ aisī 'fahīm'

duur tak miltā nahīñ insān baaqī ḳhair hai

bak raha hun aaj kal hizyan baqi KHair hai

aur lahaq hai zara nisyan baqi KHair hai

kar mere yar ki thi aur phir chori ki thi

ho gaya hai chuk mein chaalan baqi KHair hai

ghas bhi ugti nahin hai baal bhi ugte nahin

ban gaya hai sar mera maidan baqi KHair hai

fikr ki to baat koi bhi nahin hai jaan-e-jaan

ghar mein hain bas darjanon mehman baqi KHair hai

ek arsa ho gaya hai raat din thane mein hun

aur chhuTne ka nahin imkan baqi KHair hai

jis ka bangla dekh kar ghar-bar ko chhoDa gaya

wo to yaksar ho gai anjaan baqi KHair hai

bah rahi hai raat-bhar se nak sar mein dard hai

aur kuchh sunet nahin hain kan baqi KHair hai

sal se hai sas meri dakuon ki qaid mein

mangte hain wo baDa tawan baqi KHair hai

hai zara KHarish si dada-jaan ko laqwa bhi hai

aur hain bimar dadi-jaan baqi KHair hai

kal se hai bachchi ko haiza aur bachche ko buKHar

sab se chhoTe ko hua yarqan baqi KHair hai

baat ab tashwish ki koi nahin aisi 'fahim'

dur tak milta nahin insan baqi KHair hai