beauty parlour

zar ke badle husn kī ḳhairāt baTtī hai yahāñ

dekhte hī dekhte kaayā palaTtī hai yahāñ

kār-gāh-e-husn hai ye sinf-e-nāzuk ke liye

ḳharch ho jaate haiñ lākhoñ ik hasīñ look ke liye

rang kaalā ho agar us ko safedī baḳhsh deñ

'aam se chehroñ ko bhī ye tīkhe tīkhe naqsh deñ

parlour vaalī samajhtī hai sabhī kī nafsiyāt

muskurā kar dil-nashīñ lahje meñ yuuñ kartī hai baat

aap kī to jild baajī ho rahī hai ab ḳharāb

maiñ karūñgī facial ban jā.egī taaza gulāb

dekhte rah jā.eñge sab aise chamkegī skin

aap jis mahfil meñ hoñgī raat ban jā.egā din

pārTī make-up hamārā shahr meñ mash.hūr hai

husn ko aafat banānā bandī kā dastūr hai

dhaak yuuñ apnī biThā detī hai mastūrāt meñ

har kisī ko huur dikhtī hai bas apnī zaat meñ

maañ kī ḳhvāhish hai ki vo beTī se bhī kamsin lage

aisā karne meñ na jaane us ko kitne din lage

har koī vaisā nazar aa.e ki jo jaisā nahīñ

is liye bohtāt se dikhte haiñ do number hasīñ

zar ke badle husn ki KHairaat baTti hai yahan

dekhte hi dekhte kaya palaTti hai yahan

kar-gah-e-husn hai ye sinf-e-nazuk ke liye

KHarch ho jate hain lakhon ek hasin look ke liye

rang kala ho agar us ko safedi baKHsh den

'am se chehron ko bhi ye tikhe tikhe naqsh den

parlour wali samajhti hai sabhi ki nafsiyat

muskura kar dil-nashin lahje mein yun karti hai baat

aap ki to jild baji ho rahi hai ab KHarab

main karungi facial ban jaegi taza gulab

dekhte rah jaenge sab aise chamkegi skin

aap jis mahfil mein hongi raat ban jaega din

parTi make-up hamara shahr mein mashhur hai

husn ko aafat banana bandi ka dastur hai

dhak yun apni biTha deti hai masturaat mein

har kisi ko hur dikhti hai bas apni zat mein

man ki KHwahish hai ki wo beTi se bhi kamsin lage

aisa karne mein na jaane us ko kitne din lage

har koi waisa nazar aae ki jo jaisa nahin

is liye bohtat se dikhte hain do number hasin