bu-ali-sina ka sani

kisī meñ yak-ba-yak hotā hai kab aisā hunar paidā

ki ik golī ke khāne se shikam meñ hoñ bhañvar paidā

munādī ne nidā dī shahr ke har ek kūche meñ

ki tib kī saltanat kā ho gayā hai tājvar paidā

matab khulte hī aḳhbārāt meñ ye ishtihār aayā

huā hai bū-alī-sīnā kī sūrat dīda-var paidā

vo jab bīmār ko chamcha davā.ī kā pilātā hai

badan meñ us ke hote haiñ sharar-andar-sharar paidā

samundar meñ use ġhota lagāne kī nahīñ hājat

vo paanī bech ke kar letā hai la.al-o-gohar paidā

davā.eñ us kī khāne kī faqat do hī natīje haiñ

kabhī dard-e-kamar paidā kabhī zo.af-e-jigar paidā

marīzoñ ko musalsal maar ke ye mujh se farmāyā

ki ḳhūn-e-sad-hazār anjum se hotī hai sahar paidā

kisi mein yak-ba-yak hota hai kab aisa hunar paida

ki ek goli ke khane se shikam mein hon bhanwar paida

munadi ne nida di shahr ke har ek kuche mein

ki tib ki saltanat ka ho gaya hai tajwar paida

matab khulte hi aKHbaraat mein ye ishtihaar aaya

hua hai bu-ali-sina ki surat dida-war paida

wo jab bimar ko chamcha dawai ka pilata hai

badan mein us ke hote hain sharar-andar-sharar paida

samundar mein use ghota lagane ki nahin hajat

wo pani bech ke kar leta hai lal-o-gohar paida

dawaen us ki khane ki faqat do hi natije hain

kabhi dard-e-kamar paida kabhi zoaf-e-jigar paida

marizon ko musalsal mar ke ye mujh se farmaya

ki KHun-e-sad-hazar anjum se hoti hai sahar paida