chana jor garam

dekhiye aaj kā aḳhbār chanā jor garam

tez election kā hai bāzār chanā jor garam

aa ga.e qaum ke ġham-ḳhvār chanā jor garam

lag gayā va.adoñ kā ambār chanā jor garam

ḳhuub khul khelne kā mausam-e-rañgīñ aayā

pāñch barsoñ kā hai bevhār chanā jor garam

ghar se bāhar jo nikaliye to har ik nukkaḌ par

suniye taqrīr dhuāñ-dhār chanā jor garam

muḳhtalif qism ke na.aroñ se galī kūchoñ ke

gūñjte haiñ dar-o-dīvār chanā jor garam

ḳhvāncha sar pe liye chīḳh rahā hai har dil

hai mirā sab se mazedār chanā jor garam

dal-badal jitne haiñ kahte haiñ ye siina taane

ham haiñ 'ġhālib' ke taraf-dār chanā jor garam

note jo degā usī samt ye jhuk jā.egā

apnā īmāñ hai lachak-dār chanā jor garam

banda-o-sāhab-o-muhtāj-o-ġhanī ek hue

hai ajab vote kā byopār chanā jor garam

ik pur-āshob zamāne kī hai aamad aamad

haiñ bure vaqt ke āsār chanā jor garam

kal jo qātil the vahī aa.e masīhā ban kar

rahiye in logoñ se hushyār chanā jor garam

aah jantā kā muqaddar nahīñ badlegā kabhī

bane jis dal kī bhī sarkār chanā jor garam

is election ke zamāne meñ bhī tū ne 'asrār'

kyā khilā.e gul-e-ash.ār chanā jor garam

dekhiye aaj ka aKHbar chana jor garam

tez election ka hai bazar chana jor garam

aa gae qaum ke gham-KHwar chana jor garam

lag gaya wadon ka ambar chana jor garam

KHub khul khelne ka mausam-e-rangin aaya

panch barson ka hai bewhaar chana jor garam

ghar se bahar jo nikaliye to har ek nukkaD par

suniye taqrir dhuan-dhaar chana jor garam

muKHtalif qism ke naron se gali kuchon ke

gunjte hain dar-o-diwar chana jor garam

KHwancha sar pe liye chiKH raha hai har dil

hai mera sab se mazedar chana jor garam

dal-badal jitne hain kahte hain ye sina tane

hum hain 'ghaalib' ke taraf-dar chana jor garam

note jo dega usi samt ye jhuk jaega

apna iman hai lachak-dar chana jor garam

banda-o-sahab-o-muhtaj-o-ghani ek hue

hai ajab wote ka byopar chana jor garam

ek pur-ashob zamane ki hai aamad aamad

hain bure waqt ke aasar chana jor garam

kal jo qatil the wahi aae masiha ban kar

rahiye in logon se hushyar chana jor garam

aah janta ka muqaddar nahin badlega kabhi

bane jis dal ki bhi sarkar chana jor garam

is election ke zamane mein bhi tu ne 'asrar'

kya khilae gul-e-ashaar chana jor garam