chor-sahib se darKHwast

ek surḳhī chor ne ghar kā safāyā kar diyā

ghar jo apnā thā use bilkul parāyā kar diyā

ghar ke kapḌe rūpaya paisa aur talā.ī zevrāt

le gayā hai chor ye sāmāñ ba-vaqt-e-vārdāt

ye jo farmāyā ki ġhā.eb ho ga.e haiñ zevrāt

is kā ye matlab huā choroñ meñ haiñ kuchh ''begamāt''

hai jo us sāmāñ meñ majmūa koī ash.ār kā

is se kuchh andāza hogā chor ke me.aar kā

qīmtī sāmān meñ ''murġhā'' bhī shāmil hai agar

dūsrī line pe socheñge phir arbāb-e-nazar

chor-sāhib ko pakaḌne meñ police ho ab jo fail

maiñ batā.ūñ kis tarah mujrim ko ho saktī hai jail

jis ke ghar chorī huī hai bhuul jaa.e ye rapaT

yuuñ to dil meñ chor ke ho jā.egī paidā kapaT

nāhaq us shahrī ke dil kī hasratoñ kā ḳhuun ho

vo ab ik darḳhvāst likkhe jis kā ye mazmūn ho

chor-sāhib aap ne taklīf farmā.ī thī raat

ittifāqan so rahā thā maiñ ba-vaqt-e-vārdāt

aap mere ghar ba-sad-ummīd-o-armāñ aa.e the

balki ghar meñ apne hī mānind-e-mehmāñ aa.e the

aap kī ḳhātir na ho paa.ī bahut afsos hai

ghar meñ thī us vaqt tanhā.ī bahut afsos hai

aap ne ḳhādim ke ghar kā jo safāyā kar diyā

jis jagah thī gandagī rahmat kā saayā kar diyā

is safā.ī ke liye ham aap ke mamnūn haiñ

haañ abhī ghar meñ ka.ī sehhat-talab mazmūn haiñ

chor-sāhib aap ko taklīf to hogī magar

phir safāyā chāhtā hai kuchh makānoñ kā gutter

aap phir taklīf farmā.eñ jo az-rāh-e-karam

is mohalle meñ ġharīboñ kā bhī rah jaa.e bharam

ghar ko ā.īna banā deñ ab ke jab tashrīf laa.eñ

vaqt pahle se batā deñ ab ke jab tashrīf laa.eñ

merā afsāna jo ġhā.eb kar diyā hai aap ne

is meñ apnā rañg bhī kyā bhar diyā hai aap ne

is kā kyā hogā ye jo unvān aadhā rah gayā

ye bhī lete jaa.eñ jo sāmān aadhā rah gayā

ek surKHi chor ne ghar ka safaya kar diya

ghar jo apna tha use bilkul paraya kar diya

ghar ke kapDe rupaya paisa aur talai zewraat

le gaya hai chor ye saman ba-waqt-e-wardat

ye jo farmaya ki ghaeb ho gae hain zewraat

is ka ye matlab hua choron mein hain kuchh begamat

hai jo us saman mein majmua koi ashaar ka

is se kuchh andaza hoga chor ke mear ka

qimti saman mein murgha bhi shamil hai agar

dusri line pe sochenge phir arbab-e-nazar

chor-sahib ko pakaDne mein police ho ab jo fail

main bataun kis tarah mujrim ko ho sakti hai jail

jis ke ghar chori hui hai bhul jae ye rapaT

yun to dil mein chor ke ho jaegi paida kapaT

nahaq us shahri ke dil ki hasraton ka KHun ho

wo ab ek darKHwast likkhe jis ka ye mazmun ho

chor-sahib aap ne taklif farmai thi raat

ittifaqan so raha tha main ba-waqt-e-wardat

aap mere ghar ba-sad-ummid-o-arman aae the

balki ghar mein apne hi manind-e-mehman aae the

aap ki KHatir na ho pai bahut afsos hai

ghar mein thi us waqt tanhai bahut afsos hai

aap ne KHadim ke ghar ka jo safaya kar diya

jis jagah thi gandagi rahmat ka saya kar diya

is safai ke liye hum aap ke mamnun hain

han abhi ghar mein kai sehhat-talab mazmun hain

chor-sahib aap ko taklif to hogi magar

phir safaya chahta hai kuchh makanon ka gutter

aap phir taklif farmaen jo az-rah-e-karam

is mohalle mein gharibon ka bhi rah jae bharam

ghar ko aaina bana den ab ke jab tashrif laen

waqt pahle se bata den ab ke jab tashrif laen

mera afsana jo ghaeb kar diya hai aap ne

is mein apna rang bhi kya bhar diya hai aap ne

is ka kya hoga ye jo unwan aadha rah gaya

ye bhi lete jaen jo saman aadha rah gaya