dakuon ki conference

maiñ ne kal ik ḳhvāb dekhā jo kabhī dekhā na thā

sach agar pūchho to yaaro so ke bhī soyā na thā

ajnabī se shahr meñ paiham rahā masrūf-e-sair

ek ik zarra jahāñ kā thā mirī nazroñ meñ ġhair

ruk ga.e ik qasr-e-nau ke sāmne mere qadam

ek banner par nazar aa.ī ibārat ye raqam

is jagah par tālibān-e-amn kī hai bazm-e-ām

qaum kī islāh kī ḳhātir hai saarā ehtimām

bāniyān-e-bazm haiñ chañmbal ke saare rāhzan

har qadam jin kā huā kartā thā kal tak dil-shikan

aaj har rahzan karegā khul ke duniyā se ḳhitāb

ḳhud uThā.eñge sab apne kārnāmoñ se naqāb

phir kareñge zeb tan pe rahnumāoñ kā libās

sab ke dil se aaj miT jā.egā har ḳhauf-o-hirās

pahle sadr-e-mohtaram ne ḳhud hī ik taqrīr kī

aur farmāyā ki jab thā mujh ko zauq-e-rahzanī

merī nazroñ meñ koī bhī jaan kī qīmat na thī

ik urūs-e-nau ke bhī armān kī qīmat na thī

merī gardan par hai jaane kitne māsūmoñ kā ḳhuun

qatl aur ġhārat-garī kā bhī rahā barsoñ junūn

mujh ko apne kārnāmoñ par hamesha naaz thā

kyā kahūñ apne junūñ par mujh ko kitnā naaz thā

jitne Daaku the vahāñ sab ne yūñhī taqrīr kī

apnī guzrī zindagī par sab ne Daalī raushnī

ek ne yuuñ bhī kahā maiñ rahzanoñ kā huuñ imaam

mere hāthoñ se huā hai bastiyoñ meñ qatl-e-ām

thā police kā ek jatthā bhī barābar kā sharīk

kotvāl-e-shahr bhī kahtā thā hai ye kaam Thiik

sarparastī leaderoñ kī bhī rahī hāsil mujhe

chehra dikhlātā rahā zau-bār mustaqbil mujhe

log jin ko rahbarān-e-vaqt kahte the yahāñ

dar-haqīqat vo mire akasr rahe haiñ pāsbāñ

āḳhirī Daaku ne aa kar is tarah taqrīr kī

aam rahzan se alag thā merā tarz-e-rahzanī

maiñ bhī Daaku huuñ magar merī adā kuchh aur hai

dar-haqīqat merā andāz-e-jafā kuchh aur hai

roz-e-avval se mujhe hai sirf smuggling kā shauq

bā.is-e-shohrat rahā hai merā ye maḳhsūs zauq

mustaqil hotā rahā merī tijārat ko faroġh

kah rahā huuñ jo ḳhudā shāmil nahīñ is meñ daroġh

hai police kī muḳhbirī karnā bhī merā ik usuul

jānte haiñ sab yahāñ maiñ ne khilā.e haiñ jo phuul

mere kārobār kī sab ko ḳhudā taufīq de

ye tamannā hai ki mujh se bhī sivā taufīq de

apnī apnī tarz meñ ham ko burā kahte haiñ log

is se ham achchhī tarah vāqif haiñ kyā kahte haiñ log

ham mubārakbād ke laa.eq haiñ is ke bāvajūd

kyuuñ ki poshīda naqāboñ meñ nahīñ apnā vajūd

rahbaroñ kā ab to hai har zāhirī aalam fareb

pārsā ban kar nahīñ dete kisī ko ham fareb

bhole-bhāle log aa jaate haiñ un kī baat meñ

lūTte haiñ din meñ ye ham lūTte haiñ raat meñ

un ke qaul o fel meñ hai raat aur din kā tazād

ye nahīñ karte ḳhudā kī rahmatoñ par e'timād

raat din in kī riyā-kārī ke bante haiñ usuul

in kā daavā hai ġhalat un kī ibādat hai fuzūl

rahzanoñ se mat Daro tum pārsāoñ se bachcho

leadarān-e-qaum kī zālim adāoñ se Daro

main ne kal ek KHwab dekha jo kabhi dekha na tha

sach agar puchho to yaro so ke bhi soya na tha

ajnabi se shahr mein paiham raha masruf-e-sair

ek ek zarra jahan ka tha meri nazron mein ghair

ruk gae ek qasr-e-nau ke samne mere qadam

ek banner par nazar aai ibarat ye raqam

is jagah par taliban-e-amn ki hai bazm-e-am

qaum ki islah ki KHatir hai sara ehtimam

baniyan-e-bazm hain chanmbal ke sare rahzan

har qadam jin ka hua karta tha kal tak dil-shikan

aaj har rahzan karega khul ke duniya se KHitab

KHud uThaenge sab apne karnamon se naqab

phir karenge zeb tan pe rahnumaon ka libas

sab ke dil se aaj miT jaega har KHauf-o-hiras

pahle sadr-e-mohtaram ne KHud hi ek taqrir ki

aur farmaya ki jab tha mujh ko zauq-e-rahzani

meri nazron mein koi bhi jaan ki qimat na thi

ek urus-e-nau ke bhi arman ki qimat na thi

meri gardan par hai jaane kitne masumon ka KHun

qatl aur ghaarat-gari ka bhi raha barson junun

mujh ko apne karnamon par hamesha naz tha

kya kahun apne junun par mujh ko kitna naz tha

jitne Daku the wahan sab ne yunhi taqrir ki

apni guzri zindagi par sab ne Dali raushni

ek ne yun bhi kaha main rahzanon ka hun imam

mere hathon se hua hai bastiyon mein qatl-e-am

tha police ka ek jattha bhi barabar ka sharik

kotwal-e-shahr bhi kahta tha hai ye kaam Thik

sarparasti leaderon ki bhi rahi hasil mujhe

chehra dikhlata raha zau-bar mustaqbil mujhe

log jin ko rahbaran-e-waqt kahte the yahan

dar-haqiqat wo mere akasr rahe hain pasban

aaKHiri Daku ne aa kar is tarah taqrir ki

aam rahzan se alag tha mera tarz-e-rahzani

main bhi Daku hun magar meri ada kuchh aur hai

dar-haqiqat mera andaz-e-jafa kuchh aur hai

roz-e-awwal se mujhe hai sirf smuggling ka shauq

bais-e-shohrat raha hai mera ye maKHsus zauq

mustaqil hota raha meri tijarat ko farogh

kah raha hun jo KHuda shamil nahin is mein darogh

hai police ki muKHbiri karna bhi mera ek usul

jaante hain sab yahan main ne khilae hain jo phul

mere karobar ki sab ko KHuda taufiq de

ye tamanna hai ki mujh se bhi siwa taufiq de

apni apni tarz mein hum ko bura kahte hain log

is se hum achchhi tarah waqif hain kya kahte hain log

hum mubarakbaad ke laeq hain is ke bawajud

kyun ki poshida naqabon mein nahin apna wajud

rahbaron ka ab to hai har zahiri aalam fareb

parsa ban kar nahin dete kisi ko hum fareb

bhole-bhaale log aa jate hain un ki baat mein

luTte hain din mein ye hum luTte hain raat mein

un ke qaul o fel mein hai raat aur din ka tazad

ye nahin karte KHuda ki rahmaton par e'timad

raat din in ki riya-kari ke bante hain usul

in ka dawa hai ghalat un ki ibaadat hai fuzul

rahzanon se mat Daro tum parsaon se bachcho

leadaran-e-qaum ki zalim adaon se Daro