dil ki dil hi mein rahi

le ke vo aa.ī huī thiiñ apne shauhar se talāq

chāhtī thiiñ ahliya ko maiñ bhī duuñ dāġh-e-firāq

saath apne laa.ī thiiñ vo chhe adad bachchoñ ko bhī

aur kahtī thiiñ ki kar do apne chhe bachchoñ ko aaq

koThiyāñ careñ ka.ī aur bank balance be-hisāb

shahr meñ thā har jagah mash.hūr un kā tumtarāq

sar kaḌāhī meñ ho jaise ghī meñ pān.cho uñgliyāñ

thā proposal hī aisā kyoñ na baḌhtā ishtiyāq

muñh meñ paanī aa gayā mere ye sab kuchh dekh kar

zikr begam se kiyā maiñ ne phir az-rāh-e-mazāq

bar-sabīl-e-tazkira hī baat un se chheḌ dī

taaki kuchh aisā lage jaise ho bas ik ittifāq

zikr karnā thā ki vo aape se bāhar ho ga.iiñ

aa gayā fauran samajh meñ is kahānī kā siyāq

vo jalāl aayā unheñ ki al-amān-o-al-hafīz

muñh bhī un kā phail kar aisā huā jaise tabāq

qadr thī lāzim mire jazbāt kī un par magar

is takalluf ko unhoñ ne rakh diyā bālā-e-tāq

phir mirī durgat banī aisī ki kuchh mat pochhiye

haDDiyoñ se aa rahī thī ye sadā taḌ taḌ taḌāq

le ke wo aai hui thin apne shauhar se talaq

chahti thin ahliya ko main bhi dun dagh-e-firaq

sath apne lai thin wo chhe adad bachchon ko bhi

aur kahti thin ki kar do apne chhe bachchon ko aaq

koThiyan caren kai aur bank balance be-hisab

shahr mein tha har jagah mashhur un ka tumtaraq

sar kaDahi mein ho jaise ghi mein pancho ungliyan

tha proposal hi aisa kyon na baDhta ishtiyaq

munh mein pani aa gaya mere ye sab kuchh dekh kar

zikr begam se kiya main ne phir az-rah-e-mazaq

bar-sabil-e-tazkira hi baat un se chheD di

taki kuchh aisa lage jaise ho bas ek ittifaq

zikr karna tha ki wo aape se bahar ho gain

aa gaya fauran samajh mein is kahani ka siyaq

wo jalal aaya unhen ki al-aman-o-al-hafiz

munh bhi un ka phail kar aisa hua jaise tabaq

qadr thi lazim mere jazbaat ki un par magar

is takalluf ko unhon ne rakh diya baala-e-taq

phir meri durgat bani aisi ki kuchh mat pochhiye

haDDiyon se aa rahi thi ye sada taD taD taDaq