dilli ki laDkiyan

koī ragaḌ na vaqt kī be-nām kar sakī

koī ghuTan na ġharq-e-mai-o-jām kar sakī

duniyā kī jhāeñ-jhap kahāñ nākām kar sakī

bāñkā na baal gardish-e-ayyām kar sakī

Takrā chukā huuñ 'rustam' o 'dārā' kī zaat se

jab bhī shikast khaa.ī hai aurat ke haath se

vo husn vo jamāl vo mastī se pur badan

chehre ke ā.īne meñ mahakte hue chaman

uḌ jaa.e niiñd dekh ke sīnoñ kā bāñkpan

bheje pe tesha maar le dekhe jo kohkan

zulfeñ jhaTak ke paas se jo bhī guzar ga.ī

aisā lagā ki gardish-e-daurāñ Thahar ga.ī

vo chāñdnī sā ruup vo zulfoñ ke pech-o-ḳham

nāzuk sī pinDlī us meñ vo pāyal kī chham pe chham

āñkheñ nashīlī us pe qayāmat charas ke dam

zinda haiñ ham huzūr hai allāh kā karam

dekhe jo qais husn to lailā ko bhuul jaa.e

ham kyā haiñ rīsh-e-hazrat-maulānā jhuul jaa.e

chustī-bharā libās jhalaktā huā shabāb

chehre ke ā.īne meñ mahakte hue gulāb

vo dhuup se ḳhirām vo chehra ke āftāb

vo baal jaise vādī-e-kashmīr meñ sahāb

kitne hī qais husn kī daldal meñ phañs ga.e

shahroñ ko chhoḌ chhoḌ ke jañgal meñ bas ga.e

duniyā ke husn-ḳhāne meñ miltī nahīñ misāl

ik husn-e-lā-zavāl hai ik husn-e-bā-kamāl

ik 'mīr' kī ġhazal hai to 'ġhālib' kā ik ḳhayāl

is vādī-e-jamāl meñ jiinā hai ab muhāl

mehñdī lage vo haath vo miinā sī uñgliyāñ

ham ko tabāh kar ga.iiñ dillī kī laḌkiyāñ

koi ragaD na waqt ki be-nam kar saki

koi ghuTan na gharq-e-mai-o-jam kar saki

duniya ki jhaen-jhap kahan nakaam kar saki

banka na baal gardish-e-ayyam kar saki

Takra chuka hun 'rustam' o 'dara' ki zat se

jab bhi shikast khai hai aurat ke hath se

wo husn wo jamal wo masti se pur badan

chehre ke aaine mein mahakte hue chaman

uD jae nind dekh ke sinon ka bankpan

bheje pe tesha mar le dekhe jo kohkan

zulfen jhaTak ke pas se jo bhi guzar gai

aisa laga ki gardish-e-dauran Thahar gai

wo chandni sa rup wo zulfon ke pech-o-KHam

nazuk si pinDli us mein wo payal ki chham pe chham

aankhen nashili us pe qayamat charas ke dam

zinda hain hum huzur hai allah ka karam

dekhe jo qais husn to laila ko bhul jae

hum kya hain rish-e-hazrat-maulana jhul jae

chusti-bhara libas jhalakta hua shabab

chehre ke aaine mein mahakte hue gulab

wo dhup se KHiram wo chehra ke aaftab

wo baal jaise wadi-e-kashmir mein sahab

kitne hi qais husn ki daldal mein phans gae

shahron ko chhoD chhoD ke jangal mein bas gae

duniya ke husn-KHane mein milti nahin misal

ek husn-e-la-zawal hai ek husn-e-ba-kamal

ek 'mir' ki ghazal hai to 'ghaalib' ka ek KHayal

is wadi-e-jamal mein jina hai ab muhaal

mehndi lage wo hath wo mina si ungliyan

hum ko tabah kar gain dilli ki laDkiyan