duniya ki do-rangi dekho to jab ghar mein faqe hote hain

duniyā kī do-rangī dekho to jab ghar meñ faaqe hote haiñ

vo dekh ke ham ko hañste haiñ vo dekh ke ham ko rote haiñ

faiyyaz milī hai vo biivī sālāna bachche hote haiñ

kuchh is karvaT meñ rote haiñ kuchh us karvaT meñ rote haiñ

kuchh naak meñ dam iflās se hai kuchh naak meñ dam aulād se hai

ik jānib faaqa hotā hai ik jānib bachche hote haiñ

jo chhoTī moTī qaumeñ haiñ duniyā meñ maza uḌātī haiñ

jo ḳhāndān ke achchhe haiñ bhaTToñ pe īñTeñ Dhote haiñ

jab raat hotī in bachchoñ se bas kil-bil kil-bil rahtī hai

kuchh jāgte haiñ kuchh sote haiñ kuchh hañste haiñ kuchh rote haiñ

ġhārat hoñ ḳhudā hajjām kahīñ nāpaid kahīñ ye dhobī hoñ

ek aana hajāmat lete haiñ ek aana kapḌā dhote haiñ

ye hastī bhī kuchh hastī hai ye jiinā bhī kuchh jiinā hai

do din khāne ko miltā hai aur do din faaqe hote haiñ

go laakh nahūsat ho ghar meñ poshish to saaf aur suthrī hai

rupya kā sābun lā kar ham ghar meñ hī kapḌe dhote haiñ

ash.ār sune jab 'būm' ke kuchh farmāyā ham bhī vāqif haiñ

vo chhoTe ḳhaañ ke beTe haiñ vo vazīr ḳhaañ ke pote haiñ

duniya ki do-rangi dekho to jab ghar mein faqe hote hain

wo dekh ke hum ko hanste hain wo dekh ke hum ko rote hain

faiyyaz mili hai wo biwi salana bachche hote hain

kuchh is karwaT mein rote hain kuchh us karwaT mein rote hain

kuchh nak mein dam iflas se hai kuchh nak mein dam aulad se hai

ek jaanib faqa hota hai ek jaanib bachche hote hain

jo chhoTi moTi qaumen hain duniya mein maza uDati hain

jo KHandan ke achchhe hain bhaTTon pe inTen Dhote hain

jab raat hoti in bachchon se bas kil-bil kil-bil rahti hai

kuchh jagte hain kuchh sote hain kuchh hanste hain kuchh rote hain

ghaarat hon KHuda hajjam kahin napaid kahin ye dhobi hon

ek aana hajamat lete hain ek aana kapDa dhote hain

ye hasti bhi kuchh hasti hai ye jina bhi kuchh jina hai

do din khane ko milta hai aur do din faqe hote hain

go lakh nahusat ho ghar mein poshish to saf aur suthri hai

rupya ka sabun la kar hum ghar mein hi kapDe dhote hain

ashaar sune jab 'bum' ke kuchh farmaya hum bhi waqif hain

wo chhoTe KHan ke beTe hain wo wazir KHan ke pote hain