farzi latifa

ḳhudā hāfiz musalmānoñ kā akbar

mujhe to in kī ḳhush-hālī se hai yaas

ye āshiq shāhid-e-maqsūd ke haiñ

na jā.eñge va-lekin sa.ī ke paas

sunā.ūñ tum ko ik farzī latīfa

kiyā hai jis ko maiñ ne zeb-e-qirtās

kahā majnūñ se ye lailā kī maañ ne

ki beTā tū agar kar le M-A paas

to fauran byaah duuñ lailā ko tujh se

bilā diqqat maiñ ban jā.ūñ tirī saas

kahā majnūñ ne ye achchhī sunā.ī

kujā āshiq kujā college kī bakvās

kujā ye fitratī josh-e-tabī.at

kujā Thūñsī huī chīzoñ kā ehsās

baḌī bī aap ko kyā ho gayā hai

hiran pe laadī jaatī hai kahīñ ghaas

ye achchhī qadrdānī aap ne kī

mujhe samjhā hai koī har charan daas

dil apnā ḳhuun karne ko huuñ maujūd

nahīñ manzūr maġhz-e-sar kā āmās

yahī Thahrī jo shart-e-vasl-e-lailā

to istīfā mirā bā-hasrat-o-yās

KHuda hafiz musalmanon ka akbar

mujhe to in ki KHush-haali se hai yas

ye aashiq shahid-e-maqsud ke hain

na jaenge wa-lekin sai ke pas

sunaun tum ko ek farzi latifa

kiya hai jis ko main ne zeb-e-qirtas

kaha majnun se ye laila ki man ne

ki beTa tu agar kar le M-A pas

to fauran byah dun laila ko tujh se

bila diqqat main ban jaun teri sas

kaha majnun ne ye achchhi sunai

kuja aashiq kuja college ki bakwas

kuja ye fitrati josh-e-tabiat

kuja Thunsi hui chizon ka ehsas

baDi bi aap ko kya ho gaya hai

hiran pe ladi jati hai kahin ghas

ye achchhi qadrdani aap ne ki

mujhe samjha hai koi har charan das

dil apna KHun karne ko hun maujud

nahin manzur maghz-e-sar ka aamas

yahi Thahri jo shart-e-wasl-e-laila

to istifa mera ba-hasrat-o-yas