gale-baz shaer

gale-bāzī ke liye mulk meñ mash.hūr haiñ ham

sher kahne kā savāl aa.e to majbūr haiñ ham

apne ash.ār samajhne se bhī ma.azūr haiñ ham

fan se 'ġhālib' ke bahut duur bahut duur haiñ ham

apnī shohrat kī alag raah nikālī ham ne

kisī dīvāñ se ġhazal koī churā lī ham ne

sarqa-e-fan pe sabhī sāhab-e-fan jhuum uThe

sher aise the ki arbāb-e-suḳhan jhuum uThe

lāla-ruḳh jhuum uThe shola-badan jhuum uThe

shaiḳh-jī jhuum uThe lāla-madan jhuum uThe

kal jo qaa.em thā hamārā vo bharam aaj bhī hai

ya.anī allāh kā maḳhsūs karam aaj bhī hai

kahīñ nau-sau hameñ milte haiñ kahīñ DheḌh-hazār

chāhne vaale haiñ itne ki nahīñ koī shumār

ek ik sher ko paḌhvāte haiñ sab das das baar

yā ilāhī na ho āvāz hamārī be-kār

hogī āvāz jo be-kār to mar jā.eñge

mar ke bhī chain na paayā to kidhar jā.eñge

roz rahte haiñ safar meñ hameñ sab jānte haiñ

'nāzish' o 'hāfiz' o 'ḳhayyām' hameñ mānte haiñ

kitne hī ġhālib-e-daurāñ hameñ gardānte haiñ

'nūr'-bhayyā huuñ ki 'tābāñ' sabhī pahchānte haiñ

roz hote haiñ vatan meñ adabī hañgāme

ek din meñ ka.ī aa jaate haiñ dāvat-nāme

āzmāyā gayā ik din sar-e-mahfil ham ko

jab kisī ne nahīñ samjhā kisī qābil ham ko

log kahne lage har samt se jāhil ham ko

naqlī shohrat ne kuchh itnā kiyā bad-dil ham ko

dekhte haiñ hameñ nafrat se zamāne vaale

mar ga.e saare hī kyā ham ko bulāne vaale

gale-bazi ke liye mulk mein mashhur hain hum

sher kahne ka sawal aae to majbur hain hum

apne ashaar samajhne se bhi mazur hain hum

fan se 'ghaalib' ke bahut dur bahut dur hain hum

apni shohrat ki alag rah nikali hum ne

kisi diwan se ghazal koi chura li hum ne

sarqa-e-fan pe sabhi sahab-e-fan jhum uThe

sher aise the ki arbab-e-suKHan jhum uThe

lala-ruKH jhum uThe shola-badan jhum uThe

shaiKH-ji jhum uThe lala-madan jhum uThe

kal jo qaem tha hamara wo bharam aaj bhi hai

yani allah ka maKHsus karam aaj bhi hai

kahin nau-sau hamein milte hain kahin DheDh-hazar

chahne wale hain itne ki nahin koi shumar

ek ek sher ko paDhwate hain sab das das bar

ya ilahi na ho aawaz hamari be-kar

hogi aawaz jo be-kar to mar jaenge

mar ke bhi chain na paya to kidhar jaenge

roz rahte hain safar mein hamein sab jaante hain

'nazish' o 'hafiz' o 'KHayyam' hamein mante hain

kitne hi ghaalib-e-dauran hamein gardante hain

'nur'-bhayya hun ki 'taban' sabhi pahchante hain

roz hote hain watan mein adabi hangame

ek din mein kai aa jate hain dawat-name

aazmaya gaya ek din sar-e-mahfil hum ko

jab kisi ne nahin samjha kisi qabil hum ko

log kahne lage har samt se jahil hum ko

naqli shohrat ne kuchh itna kiya bad-dil hum ko

dekhte hain hamein nafrat se zamane wale

mar gae sare hi kya hum ko bulane wale