girya-e-shaitan

ho rahā thā ek din ik raah se merā guzar

yak-ba-yak jā kar paḌī shaitān par merī nazar

chahko-pahko ro rahā thā do jahāñ ke sāmne

nauha-ḳhvāñ thā dosto vo ik makāñ ke sāmne

maiñ ne pūchā ro rahā hai kis liye ḳhāna-ḳharāb

rañg laayā aaj kyā allāh kā tujh par itaab

aur dahāḌeñ maar ke rone lagā vo dil-hazīñ

ḳhauf hai bandoñ kā maiñ allāh se Dartā nahīñ

dekh liije hazrat-e-'sāġhar' ye hai us kā makāñ

ho rahā thā gardish-e-ayyām se jo be-nishāñ

maiñ ne samjhāyā karo mat vaqt ko apne ḳharāb

maiñ ne batlāyā ki tum khīñchā karo kachchī sharāb

kaam aa.egī jahāñ meñ bas tumhāre taskarī

pher do tum mulk o millat ke saroñ par bhī chhurī

barkateñ baaqī nahīñ haiñ yaar kār-e-nek meñ

fā.eda hī fā.eda hai āj-kal ismek meñ

hai zarūrī is zamāne meñ zamāne ke liye

kaam number do kā kachche ghar banāne ke liye

banda-e-iblīs kī ye hoshiyārī dekhiye

baap kī daulat samajh kar de dī saarī dekhiye

sab diyā hai maiñ ne us ko us ne phir bhī likh diyā

kārnāmoñ par mire min-fazl-e-rabbī likh diyā

aadmī shaitān se aage hai har har aib meñ

rahne ko achchhā makāñ hai aur jannat jeb meñ

ho raha tha ek din ek rah se mera guzar

yak-ba-yak ja kar paDi shaitan par meri nazar

chahko-pahko ro raha tha do jahan ke samne

nauha-KHwan tha dosto wo ek makan ke samne

main ne pucha ro raha hai kis liye KHana-KHarab

rang laya aaj kya allah ka tujh par itab

aur dahaDen mar ke rone laga wo dil-hazin

KHauf hai bandon ka main allah se Darta nahin

dekh lije hazrat-e-'saghar' ye hai us ka makan

ho raha tha gardish-e-ayyam se jo be-nishan

main ne samjhaya karo mat waqt ko apne KHarab

main ne batlaya ki tum khincha karo kachchi sharab

kaam aaegi jahan mein bas tumhaare taskari

pher do tum mulk o millat ke saron par bhi chhuri

barkaten baqi nahin hain yar kar-e-nek mein

faeda hi faeda hai aaj-kal ismek mein

hai zaruri is zamane mein zamane ke liye

kaam number do ka kachche ghar banane ke liye

banda-e-iblis ki ye hoshiyari dekhiye

bap ki daulat samajh kar de di sari dekhiye

sab diya hai main ne us ko us ne phir bhi likh diya

karnamon par mere min-fazl-e-rabbi likh diya

aadmi shaitan se aage hai har har aib mein

rahne ko achchha makan hai aur jannat jeb mein