hamare bhi hain mehrban

in ko ham apnā dost likheñ āshnā likheñ

hamdam likheñ rafīq likheñ ham-navā likheñ

sher-o-adab se un ko ta'alluq hai kis qadar

tāqat kahāñ qalam meñ ki ye mājrā likheñ

likhne meñ kuchh na kuchh haiñ vo masrūf rāt-din

kāġhaz qalam davāt meñ un ko fanā likheñ

naqd-o-nazar meñ hai vo mahārat ke ham unheñ

iqlīm-e-nazm-o-nasr kā farmāñ-ravā likheñ

yaktā ho apne fan meñ likhāḌī huā kare

dil ko nahīñ lagā to use sar-phirā likheñ

tahtus-surā se arsh-e-barīñ ek aan meñ

pahuñche vo ḳhush-nasīb jise marhabā likheñ

itnā hī ham likheñ ki samajh paa.eñ vo use

un kī pahuñch se ham na kabhī māvarā likheñ

saaqī kā aur sharāb kā ho zikr baar baar

zāhid ko bhuul kar na kabhī pārsā likheñ

mahbūb ke bayāñ meñ ho lāzim mubālaġha

chehre ko phuul zulf ko ham azhdahā likheñ

mumkin nahīñ ġhazab se bacheñ ham janāb ke

bālishtiyoñ ko bhī na agar sarv sā likheñ

lāzim hai ham pe ham jo likheñ bahr meñ rahe

ham-vazn-o-ham-radīf likheñ qāfiya likheñ

likhne meñ ehtiyāt se ham kaam leñ magar

jo un ke jī meñ aa.e use barmalā likheñ

likkhe muqaddama to musannif ba-qalam-e-ḳhud

lekin hai ye aTal ki vahī faisla likheñ

do jildeñ is liye unheñ bhejīñ kitāb kī

be-lāg apnī raa.e likheñ tabsira likheñ

bole vo dekh kar mirā majmūa-e-kalām

pahle pe kyā likhūñ chaleñ ab dūsrā likheñ

in ko hum apna dost likhen aashna likhen

hamdam likhen rafiq likhen ham-nawa likhen

sher-o-adab se un ko ta'alluq hai kis qadar

taqat kahan qalam mein ki ye majra likhen

likhne mein kuchh na kuchh hain wo masruf raat-din

kaghaz qalam dawat mein un ko fana likhen

naqd-o-nazar mein hai wo mahaarat ke hum unhen

iqlim-e-nazm-o-nasr ka farman-rawa likhen

yakta ho apne fan mein likhaDi hua kare

dil ko nahin laga to use sar-phira likhen

tahtus-sura se arsh-e-barin ek aan mein

pahunche wo KHush-nasib jise marhaba likhen

itna hi hum likhen ki samajh paen wo use

un ki pahunch se hum na kabhi mawara likhen

saqi ka aur sharab ka ho zikr bar bar

zahid ko bhul kar na kabhi parsa likhen

mahbub ke bayan mein ho lazim mubaalagha

chehre ko phul zulf ko hum azhdaha likhen

mumkin nahin ghazab se bachen hum janab ke

baalishtiyon ko bhi na agar sarw sa likhen

lazim hai hum pe hum jo likhen bahr mein rahe

ham-wazn-o-ham-radif likhen qafiya likhen

likhne mein ehtiyat se hum kaam len magar

jo un ke ji mein aae use barmala likhen

likkhe muqaddama to musannif ba-qalam-e-KHud

lekin hai ye aTal ki wahi faisla likhen

do jilden is liye unhen bhejin kitab ki

be-lag apni rae likhen tabsira likhen

bole wo dekh kar mera majmua-e-kalam

pahle pe kya likhun chalen ab dusra likhen