hamein hamari biwiyon se bachao

ye pil paḌtī haiñ ham par jab bhī ham daftar se aate haiñ

halākū-ḳhāñ se yā chañgez-ḳhāñ se in ke naate haiñ

na uTh kar pañkhā jhaltī haiñ na detī haiñ hameñ paanī

pasīna apnā ham to ThanDī aahoñ se sukhāte haiñ

unheñ lāzim hai jab ham aa.eñ ye jhuk kar qadam chhū leñ

majāzī ham ḳhudā haiñ phir bhī un par rahm khāte haiñ

uḌā letī haiñ sab naqadī talāshī jeb kī le kar

ham apnī hī kamā.ī un se Dar Dar ke chhupāte haiñ

kuchh income-tex le jaatā hai kuchh biivī uḌātī hai

qasam allāh kī shauhar bahut daulat kamāte haiñ

sahelī in kī aa jaa.e to samjho iid hai un kī

bigaḌ jaatī haiñ jab ham dostoñ ko ghar bulāte haiñ

nahīñ jātīñ kabhī bāvarchī-ḳhāne meñ ye bhūle se

kamātā hai bahut aaqā maze naukar uḌāte haiñ

bahāna kar ke dard-e-sar kā aksar leT jaatī haiñ

na ho naukar agar ghar meñ to ham chaa.e banāte haiñ

hai un kā kaam ronā paan khānā yā bigaḌ jaanā

kareñ kyā bā-dil nā-ḳhvāsta un ko manāte haiñ

ḳhudāyā aaj ke shauhar haiñ yā māsūm bachche haiñ

zarā sā ghuur le biivī to jhaT ye saham jaate haiñ

ye jab rotī haiñ ham apne kaleje thaam lete haiñ

siyāhī chuus le kar un ke aañsū ham sukhāte haiñ

hajāmat roz kar detī haiñ ye ġhusse kī qaiñchī se

ġhanīmat hai ki apnī shev to ham ḳhud banāte haiñ

azaañ jab murġh detā hai samajhtī haiñ ye lorī hai

unheñ murġhe sulāte haiñ, hameñ murġhe jagāte haiñ

chale jaate haiñ khā kar rūkhī-sūkhī apne daftar ko

bichāre mard sab ro-ro ke apne din bitāte haiñ

ba-roz-e-hashr jaise bhī haiñ shauhar baḳhshe jā.eñge

sadā jo bīviyoñ ke zulm sah kar muskurāte haiñ

kabhī āzād the ham haa.e is qaid-e-ġhulāmī se

vo din kitne the achchhe haa.e vo din yaad aate haiñ

ye pil paDti hain hum par jab bhi hum daftar se aate hain

halaku-KHan se ya changez-KHan se in ke nate hain

na uTh kar pankha jhalti hain na deti hain hamein pani

pasina apna hum to ThanDi aahon se sukhate hain

unhen lazim hai jab hum aaen ye jhuk kar qadam chhu len

majazi hum KHuda hain phir bhi un par rahm khate hain

uDa leti hain sab naqadi talashi jeb ki le kar

hum apni hi kamai un se Dar Dar ke chhupate hain

kuchh income-tex le jata hai kuchh biwi uDati hai

qasam allah ki shauhar bahut daulat kamate hain

saheli in ki aa jae to samjho id hai un ki

bigaD jati hain jab hum doston ko ghar bulate hain

nahin jatin kabhi bawarchi-KHane mein ye bhule se

kamata hai bahut aaqa maze naukar uDate hain

bahana kar ke dard-e-sar ka aksar leT jati hain

na ho naukar agar ghar mein to hum chae banate hain

hai un ka kaam rona pan khana ya bigaD jaana

karen kya ba-dil na-KHwasta un ko manate hain

KHudaya aaj ke shauhar hain ya masum bachche hain

zara sa ghur le biwi to jhaT ye saham jate hain

ye jab roti hain hum apne kaleje tham lete hain

siyahi chus le kar un ke aansu hum sukhate hain

hajamat roz kar deti hain ye ghusse ki qainchi se

ghanimat hai ki apni shew to hum KHud banate hain

azan jab murgh deta hai samajhti hain ye lori hai

unhen murghe sulate hain, hamein murghe jagate hain

chale jate hain kha kar rukhi-sukhi apne daftar ko

bichaare mard sab ro-ro ke apne din bitate hain

ba-roz-e-hashr jaise bhi hain shauhar baKHshe jaenge

sada jo biwiyon ke zulm sah kar muskuraate hain

kabhi aazad the hum hae is qaid-e-ghulami se

wo din kitne the achchhe hae wo din yaad aate hain