hamein koi matlab nahin la-makan se

hameñ koī matlab nahīñ lā-makāñ se

ġharaz hai hameñ sirf apne makāñ se

ġhamoñ kā ye aalam hai jaane kahāñ se

chale aa rahe haiñ yahāñ se vahāñ se

nikāle ga.e haiñ jo ham āshiyāñ se

shikāyat nahīñ hai hameñ bāġhbāñ se

kahīñ barq par bijliyāñ na girī hoñ

ye sho.ala sā uThtā hai kyoñ āsmāñ se

jalā hī nahīñ to dhuāñ kyā uThegā

mire narm-o-nāzuk dil-e-nā-tavāñ se

barastī nahīñ mūslā-dhār ḳhushiyāñ

utartī haiñ ye buuñd buuñd āsmāñ se

nazar merī achchhī hai phir ye nazāre

nazar aa rahe haiñ mujhe kyoñ dhuāñ se

laTaktī hai talvār sar par hamesha

bachā.e ḳhudā aise amn-o-amāñ se

kisī kī nazar 'ḳhvāh-maḳhvāh' lag na jaa.e

buḌhāpe meñ lagte ho tum naujavāñ se

hamein koi matlab nahin la-makan se

gharaz hai hamein sirf apne makan se

ghamon ka ye aalam hai jaane kahan se

chale aa rahe hain yahan se wahan se

nikale gae hain jo hum aashiyan se

shikayat nahin hai hamein baghban se

kahin barq par bijliyan na giri hon

ye shoala sa uThta hai kyon aasman se

jala hi nahin to dhuan kya uThega

mere narm-o-nazuk dil-e-na-tawan se

barasti nahin musla-dhaar KHushiyan

utarti hain ye bund bund aasman se

nazar meri achchhi hai phir ye nazare

nazar aa rahe hain mujhe kyon dhuan se

laTakti hai talwar sar par hamesha

bachae KHuda aise amn-o-aman se

kisi ki nazar 'KHwah-maKHwah' lag na jae

buDhape mein lagte ho tum naujawan se