hansi

mizāh o tanz ke jab tiir baiTheñge nishāne par

jo dīvāne haiñ un kī aql aa.egī Thikāne par

hañsī kā silsila to 'ḳhvāh-maḳhvāh' chaltā hī rahtā hai

zamāna mujh pe hañstā hai maiñ hañstā huuñ zamāne par

kaThin rāhoñ meñ jaise ham-safar bhī chhūT jaate haiñ

isī tarah safar meñ aable bhī phuuT jaate haiñ

mizāh-go huuñ magar ḳhud is liye hañsne se Dartā huuñ

hañsī se 'ḳhvāh-maḳhvāh' zaḳhmoñ ke Tāñke TuuT jaate haiñ

koī qissa hai na kahānī hai

baat jo aap ko sunānī hai

rañj aur ġham ḳhushī ke partav haiñ

aur hañsī ġham kī tarjumānī hai

tum apne dil meñ na shikva na kuchh gila rakhnā

laboñ pe sirf tabassum kā silsila rakhnā

hai zabt-e-ġham jo zarūrī to ye bhī lāzim hai

jo ro na paao to hañsne kā hausla rakhnā

ye jo muñh meñ dabī dabī hai kyā

gar hañsī hai to ye hañsī hai kyā

ye batāo gale meñ kyā koī

be-surī meñDkī phañsī hai kyā

sab ḳhatm ho chuke haiñ vo daur sharāfat ke

khulte nahīñ kisī par asrār himāqat ke

apnī hañsī uḌā kar kitne hī ġham uThā kar

sīkhe haiñ 'ḳhvāh-maḳhvāh' ne andāz zarāfat ke

mizah o tanz ke jab tir baiThenge nishane par

jo diwane hain un ki aql aaegi Thikane par

hansi ka silsila to 'KHwah-maKHwah' chalta hi rahta hai

zamana mujh pe hansta hai main hansta hun zamane par

kaThin rahon mein jaise ham-safar bhi chhuT jate hain

isi tarah safar mein aable bhi phuT jate hain

mizah-go hun magar KHud is liye hansne se Darta hun

hansi se 'KHwah-maKHwah' zaKHmon ke Tanke TuT jate hain

koi qissa hai na kahani hai

baat jo aap ko sunani hai

ranj aur gham KHushi ke partaw hain

aur hansi gham ki tarjumani hai

tum apne dil mein na shikwa na kuchh gila rakhna

labon pe sirf tabassum ka silsila rakhna

hai zabt-e-gham jo zaruri to ye bhi lazim hai

jo ro na pao to hansne ka hausla rakhna

ye jo munh mein dabi dabi hai kya

gar hansi hai to ye hansi hai kya

ye batao gale mein kya koi

be-suri meinDki phansi hai kya

sab KHatm ho chuke hain wo daur sharafat ke

khulte nahin kisi par asrar himaqat ke

apni hansi uDa kar kitne hi gham uTha kar

sikhe hain 'KHwah-maKHwah' ne andaz zarafat ke