حسن بے باک کا ویڈیو نیٹ پہ جب وائرل ہو گیا

حسن بے باک کا ویڈیو نیٹ پہ جب وائرل ہو گیا

دیکھتے دیکھتے میری عینک کا نمبر ڈبل ہو گیا

وعدۂ وصل پر میری کتنی ہی راتوں کی نیندیں اڑیں

پھر معالج کے انجیکشنوں سے مرا بازو شل ہو گیا

مختصر گفتگو بعض لوگوں کی صدیوں پہ بھاری ہوئی

اک حسینہ کے حسن بیاں سے تو گھنٹہ بھی پل ہو گیا

کوچۂ یار میں خواہش عقد لے کر ہوئی حاضری

پے بہ پے جب سوالات پوچھے گئے میں پزل ہو گیا

وہ ملی تو مرے واسطے اس کی پہچان مشکل ہوئی

خوبصورت غزل اب بدن جس کا رد غزل ہو گیا

قوم کے حق میں جو بھی تجاویز تھیں التوا میں رہیں

جن میں ذاتی مفادات تھے ان پہ فوراً عمل ہو گیا