جب فدائے چہرۂ گلنار ہو جائیں گے ہم

جب فدائے چہرۂ گلنار ہو جائیں گے ہم

اس کے دروازے پہ چوکیدار ہو جائیں گے ہم

اس گرانی کی تپش محسوس ہوگی جون تک

جب بجٹ آیا تو ٹھنڈے ٹھار ہو جائیں گے ہم

پھر مہینہ ختم ہو جانے کو ہے رمضان کا

پھر اسیر حقہ و نسوار ہو جائیں گے ہم

اپنی کشتی کیس کی منجدھار میں ہے اب تلک

مک مکا جب کر لیا تو پار ہو جائیں گے ہم

تجھ سے اپنی چشم تر کا آبیانہ جب ملا

تیرے دل کے پنڈ میں نمبر دار ہو جائیں گے ہم

گر نہ چھوڑا جھوٹ کہنا ہم نے تو پھر دیکھنا

رفتہ رفتہ شام کے اخبار ہو جائیں گے ہم

کوئی فن بھی جب ہمارے کام نہ آیا وسیمؔ

پی ٹی وی پہ اک ہدایت کار ہو جائیں گے ہم