جہاں کو قیس و لیلیٰ کا فسانہ یاد آتا ہے

جہاں کو قیس و لیلیٰ کا فسانہ یاد آتا ہے

مگر ہم کو تو کالج کا زمانہ یاد آتا ہے

نگہ پڑتی ہے جب اس شوخ کے رخسار رنگیں پر

تو مجھ کو پینٹری کا کارخانہ یاد آتا ہے

بہاتی ہیں جب اشک غم مری آنکھیں تو اے ہمدم

مجھے دریائے جہلم کا دہانہ یاد آتا ہے

سگ لیلیٰ سے مجنوں کو محبت تھی تو مجھ کو بھی

ترے کتے کا بڑھ کر کاٹ کھانا یاد آتا ہے

رقیب رو سیہ کی گت بنانا سہل ہے لیکن

ٹھٹھک جاتا ہوں میں جب مجھ کو تھانہ یاد آتا ہے

میں ان کے فون پر ملنے کا احساں یاد کرتا ہوں

مجھے اکثر یہ لطف غائبانہ یاد آتا ہے