jahan ko qais-o-laila ka fasana yaad aata hai

jahāñ ko qais-o-lailā kā fasāna yaad aatā hai

magar ham ko to college kā zamāna yaad aatā hai

nigah paḌtī hai jab us shoḳh ke ruḳhsār-e-rangīñ par

to mujh ko paintry kā kār-ḳhāna yaad aatā hai

bahātī haiñ jab ashk-e-ġham mirī āñkheñ to ai hamdam

mujhe dariyā-e-jehlum kā dahāna yaad aatā hai

sag-e-lailā se majnūñ ko mohabbat thī to mujh ko bhī

tire kutte kā baḌh kar kaaT khānā yaad aatā hai

raqīb-e-rū-siyah kī gat banānā sahl hai lekin

ThiThak jaatā huuñ maiñ jab mujh ko thāna yaad aatā hai

maiñ un ke phone par milne kā ehsāñ yaad kartā huuñ

mujhe aksar ye lutf-e-ġhā.ebāna yaad aatā hai

jahan ko qais-o-laila ka fasana yaad aata hai

magar hum ko to college ka zamana yaad aata hai

nigah paDti hai jab us shoKH ke ruKHsar-e-rangin par

to mujh ko paintry ka kar-KHana yaad aata hai

bahati hain jab ashk-e-gham meri aankhen to ai hamdam

mujhe dariya-e-jehlum ka dahana yaad aata hai

sag-e-laila se majnun ko mohabbat thi to mujh ko bhi

tere kutte ka baDh kar kaT khana yaad aata hai

raqib-e-ru-siyah ki gat banana sahl hai lekin

ThiThak jata hun main jab mujh ko thana yaad aata hai

main un ke phone par milne ka ehsan yaad karta hun

mujhe aksar ye lutf-e-ghaebana yaad aata hai