jo ahl-e-zar ne siyasat ko iKHtiyar kiya

jo ahl-e-zar ne siyāsat ko iḳhtiyār kiyā

assembliyoñ meñ pahuñch kar bhī kārobār kiyā

ye kah rahā thā hasīna se ek sabzī-farosh

tirī nazar ne chuqandar ko bhī anaar kiyā

maiñ kyā kahūñ ki mirā jism kitnī shiddat se

sagān-e-kūcha-e-mahbūb ne figār kiyā

tamām ahl-e-ziyāfat the shashdar-o-hairāñ

kisī ne murġh-e-musallam kā jab shikār kiyā

vo kah rahī thī shab-e-vasl apne dūlhā se

ye gift de ke mujhe tū ne sharmsār kiyā

tumhārā tarz-e-taġhāful bhī hang hai shāyad

ki ek 'umr tavajjoh kā intizār kiyā

jo ahl-e-zar ne siyasat ko iKHtiyar kiya

assembliyon mein pahunch kar bhi karobar kiya

ye kah raha tha hasina se ek sabzi-farosh

teri nazar ne chuqandar ko bhi anar kiya

main kya kahun ki mera jism kitni shiddat se

sagan-e-kucha-e-mahbub ne figar kiya

tamam ahl-e-ziyafat the shashdar-o-hairan

kisi ne murgh-e-musallam ka jab shikar kiya

wo kah rahi thi shab-e-wasl apne dulha se

ye gift de ke mujhe tu ne sharmsar kiya

tumhaara tarz-e-taghaful bhi hang hai shayad

ki ek 'umr tawajjoh ka intizar kiya