jute-chor

ek din maiñ ne kahā ye ek jūte-chor se

jūtiyoñ par kyuuñ hamesha terī rahtī hai nazar

aur bhī gur haiñ ka.ī rozī kamāne ke liye

chhoḌ ye chorī ke dhande koī achchhā kaam kar

sun ke merī baat ye us ne diyā hañs kar javāb

tum to bilkul choñch ho tum ko nahīñ kuchh bhī ḳhabar

is se baḌh kar kaun sā dhandā hai international

shohra-e-āfāq ālamgīr hai apnā hunar

chappa chappa chor-bāzārī kā hai bāzār garm

chal rahā hai har jagah dhandā yahī shām-o-sahar

har jagah chorī kā charchā har jagah hai lūT-mār

din-dahāḌe luT rahā hai har taraf fard-e-bashar

phir girānī kī girāñbārī se patlā haal hai

shaving stick kī vo qīmat hai ki mundh jaatā hai sar

ye vo dhandā hai barī hai qaid-e-income-tax se

ye vo pesha hai nahīñ jis par girānī kā asar

is meñ firqa-vāriyat hai aur na sūba-vāriyat

bainal-aqvāmī hamārī hai musaffā rahguzar

shart itnī hai ki ho aisī safā.ī haath meñ

ek jumbish meñ chale juutā idhar paañv udhar

jo safāyā qaum kā kar de vahī leader hai aaj

ho safā.ī haath meñ jis ke vo hai ahl-e-hunar

aur bhī is ke alāva saiñkaḌoñ aise haiñ chor

Dālte rahte haiñ jo Daake pe Daake be-ḳhatar

ba.az aise haiñ churā lete haiñ mazmūñ sher ke

aur kah lete haiñ apnā sher Daakā Daal kar

tum bhī to chorī-chhupe an-gintī karte ho gunāh

Dālte rahte ho har-sū tum bhī duzdīda nazar

jūtiyāñ chaTḳhāte tum phirte ho rozī ke liye

apnī rozī ham kamā lete haiñ juute maar kar

ek din main ne kaha ye ek jute-chor se

jutiyon par kyun hamesha teri rahti hai nazar

aur bhi gur hain kai rozi kamane ke liye

chhoD ye chori ke dhande koi achchha kaam kar

sun ke meri baat ye us ne diya hans kar jawab

tum to bilkul chonch ho tum ko nahin kuchh bhi KHabar

is se baDh kar kaun sa dhanda hai international

shohra-e-afaq aalamgir hai apna hunar

chappa chappa chor-bazari ka hai bazar garm

chal raha hai har jagah dhanda yahi sham-o-sahar

har jagah chori ka charcha har jagah hai luT-mar

din-dahaDe luT raha hai har taraf fard-e-bashar

phir girani ki giranbari se patla haal hai

shawing stick ki wo qimat hai ki mundh jata hai sar

ye wo dhanda hai bari hai qaid-e-income-tax se

ye wo pesha hai nahin jis par girani ka asar

is mein firqa-wariyat hai aur na suba-wariyat

bainal-aqwami hamari hai musaffa rahguzar

shart itni hai ki ho aisi safai hath mein

ek jumbish mein chale juta idhar panw udhar

jo safaya qaum ka kar de wahi leader hai aaj

ho safai hath mein jis ke wo hai ahl-e-hunar

aur bhi is ke alawa sainkaDon aise hain chor

Dalte rahte hain jo Dake pe Dake be-KHatar

baz aise hain chura lete hain mazmun sher ke

aur kah lete hain apna sher Daka Dal kar

tum bhi to chori-chhupe an-ginti karte ho gunah

Dalte rahte ho har-su tum bhi duzdida nazar

jutiyan chaTKHate tum phirte ho rozi ke liye

apni rozi hum kama lete hain jute mar kar