kahin dirham kahin dollar kahin dinar ka jhagDa

kahīñ dirham kahīñ dollar kahīñ dīnār kā jhagḌā

kahīñ lahñgā kahīñ cholī kahīñ shalvār kā jhagḌā

vatan meñ aaj kal is zaat se us zaat ko shikva

lagā hone kahīñ is paar se us paar kā jhagḌā

vo masjid ho ki mandir ho adab ho yā siyāsat ho

vahī hai jañg kursī kī vahī dastār kā jhagḌā

zamāne kī ravish se kar liyā hai sab ne samjhautā

koī ma.anī nahīñ rakhtā yahāñ kirdār kā jhagḌā

kisī kī Taañg TuuTe yā kisī ahmaq kā sar phūTe

agar hone lage hoshyār se hoshyār kā jhagḌā

yahī insāñ khilaunoñ ke liye bachpan meñ laḌtā hai

baḌe hone pe kartā hai dar-o-dīvār kā jhagḌā

ye duniyā-e-mohabbat bhī anokhī chiiz hai sāhab

kabhī inkār par nālish kabhī iqrār kā jhagḌā

chhiḌā jab un ke ghar jhagḌā to un kī aql chakrā.ī

jo suljhāte rahe the umr-bhar bāzār kā jhagḌā

amīroñ kī laḌā.ī meñ koī lazzat nahīñ hotī

maza aatā hai jab ho muflis-o-nādār kā jhagḌā

agar jāhil bane aalim to kar tā.īd tū us kī

'zafar' achchhā nahīñ hotā hai ye bekār kā jhagḌā

kahin dirham kahin dollar kahin dinar ka jhagDa

kahin lahnga kahin choli kahin shalwar ka jhagDa

watan mein aaj kal is zat se us zat ko shikwa

laga hone kahin is par se us par ka jhagDa

wo masjid ho ki mandir ho adab ho ya siyasat ho

wahi hai jang kursi ki wahi dastar ka jhagDa

zamane ki rawish se kar liya hai sab ne samjhauta

koi mani nahin rakhta yahan kirdar ka jhagDa

kisi ki Tang TuTe ya kisi ahmaq ka sar phuTe

agar hone lage hoshyar se hoshyar ka jhagDa

yahi insan khilaunon ke liye bachpan mein laDta hai

baDe hone pe karta hai dar-o-diwar ka jhagDa

ye duniya-e-mohabbat bhi anokhi chiz hai sahab

kabhi inkar par nalish kabhi iqrar ka jhagDa

chhiDa jab un ke ghar jhagDa to un ki aql chakrai

jo suljhate rahe the umr-bhar bazar ka jhagDa

amiron ki laDai mein koi lazzat nahin hoti

maza aata hai jab ho muflis-o-nadar ka jhagDa

agar jahil bane aalim to kar taid tu us ki

'zafar' achchha nahin hota hai ye bekar ka jhagDa