karachi ka qabristan

ai karāchī mulk-e-pakistan ke shahr-e-hasīñ

marne vāloñ ko jahāñ miltī nahīñ do gaz zamīñ

qabr kā milnā hī hai avval to ik TeḌhā savāl

aur agar mil jaa.e is par daḳhl milnā hai muhāl

hai yahī sūrat to ik aisā bhī din aa jā.egā

aane vaalā daur murdoñ par musībat Dhā.egā

mard maañ bisyār hoñge aur jā-e-qabr tañg

qabr kī taqsīm par murdoñ meñ chhiḌ jā.egī jañg

siit qabristān meñ pahle vo murde pā.eñge

jo kisī murda minister kī sifārish lā.eñge

corporation karegā ik resolution ye paas

ke d ai ab marne vāloñ se kare ye iltimās

aap ko marnā hai to pahle se notice dījiye

ya.anī jurm-e-intiqāl-e-nā-gahāñ mat kījiye

kuchh mahīne ke liye ho jā.egī turbat allot

is ke ba.ad aa.egā notice chhoḌ diije ye plot

turbat-e-shauhar meñ us kī ahliya so jā.egī

mahv-e-hairat huuñ ki turbat kyā se kyā ho jā.egī

ek hī tābūt hogā aur murde aaTh das

aap ise tābūt kahiye yā private bas

ek hī turbat meñ so jā.eñge mahmūd o ayaaz

duur ho jā.egā farq-e-banda-o-banda-navāz

shā.er-e-marhūm jab zer-e-mazār aa jā.egā

dūsre murdoñ ko haibat se buḳhār aa jā.egā

us se ye keh kar kareñge aur murde ehtijāj

ham ko hotā hai tumhārī shā.erī se iḳhtilāj

ḳhāmushī shahr-e-ḳhamoshāñ meñ hai dastūr-e-azal

tum yahāñ bhī chheḌ doge ġhair-matbūa ġhazal

ham kaheñge so raho ārām karnā farz hai

tum kahoge ho chukā ārām matl.a arz hai

surḳhiyāñ ye hoñgī ''jañg'' o ''hurriyat'' meñ ''don'' meñ

Daal lī haiñ jhuggiyāñ murdoñ ne qabristān meñ

raat do murdoñ ne hañgāma kiyā zer-e-mazār

ek murda jail meñ hai dūsrā murda farār

ek murda bhaag uThā thā chhoḌ kar gor-o-kafan

qabr par marhūm kī hai qabza-e-custodian

bartarī jaatī rahī hifz-e-marātib miT gayā

ek murda ik police vaale ke hāthoñ piT gayā

raat ik turbat pe do murdoñ meñ saudā paT gayā

ek murda pāñch sau pagḌī ke le kar haT gayā

ham to samjhe the hameñ haiñ is jahāñ meñ be-qarār

is jahāñ vāloñ ko bhī miltī nahīñ rāh-e-farār

sirf zindoñ hī ko fikr-e-aish-o-āsā.ish nahīñ

ab to is duniyā meñ murdoñ kī bhī gunjā.ish nahīñ

ai karachi mulk-e-pakistan ke shahr-e-hasin

marne walon ko jahan milti nahin do gaz zamin

qabr ka milna hi hai awwal to ek TeDha sawal

aur agar mil jae is par daKHl milna hai muhaal

hai yahi surat to ek aisa bhi din aa jaega

aane wala daur murdon par musibat Dhaega

mard man bisyar honge aur ja-e-qabr tang

qabr ki taqsim par murdon mein chhiD jaegi jang

sit qabristan mein pahle wo murde paenge

jo kisi murda minister ki sifarish laenge

corporation karega ek resolution ye pas

ke d ai ab marne walon se kare ye iltimas

aap ko marna hai to pahle se notice dijiye

yani jurm-e-intiqal-e-na-gahan mat kijiye

kuchh mahine ke liye ho jaegi turbat allot

is ke baad aaega notice chhoD dije ye plot

turbat-e-shauhar mein us ki ahliya so jaegi

mahw-e-hairat hun ki turbat kya se kya ho jaegi

ek hi tabut hoga aur murde aaTh das

aap ise tabut kahiye ya priwate bas

ek hi turbat mein so jaenge mahmud o ayaz

dur ho jaega farq-e-banda-o-banda-nawaz

shaer-e-marhum jab zer-e-mazar aa jaega

dusre murdon ko haibat se buKHar aa jaega

us se ye keh kar karenge aur murde ehtijaj

hum ko hota hai tumhaari shaeri se iKHtilaj

KHamushi shahr-e-KHamoshan mein hai dastur-e-azal

tum yahan bhi chheD doge ghair-matbua ghazal

hum kahenge so raho aaram karna farz hai

tum kahoge ho chuka aaram matla arz hai

surKHiyan ye hongi jang o hurriyat mein don mein

Dal li hain jhuggiyan murdon ne qabristan mein

raat do murdon ne hangama kiya zer-e-mazar

ek murda jail mein hai dusra murda farar

ek murda bhag uTha tha chhoD kar gor-o-kafan

qabr par marhum ki hai qabza-e-custodian

bartari jati rahi hifz-e-maraatib miT gaya

ek murda ek police wale ke hathon piT gaya

raat ek turbat pe do murdon mein sauda paT gaya

ek murda panch sau pagDi ke le kar haT gaya

hum to samjhe the hamein hain is jahan mein be-qarar

is jahan walon ko bhi milti nahin rah-e-farar

sirf zindon hi ko fikr-e-aish-o-asaish nahin

ab to is duniya mein murdon ki bhi gunjaish nahin