karachi ki bus

bus meñ laTak rahā thā koī haar kī tarah

koī paḌā thā sāya-e-dīvār kī tarah

sahmā huā thā koī gunāhgār kī tarah

koī phañsā thā murġh-e-giraftār kī tarah

mahrūm ho gayā thā koī ek paañv se

juutā badal gayā thā kisī kā khaḌā.ūñ se

koī pukārtā thā mirī jeb kaT ga.ī

kahtā thā koī merī na.ī painT phaT ga.ī

bus meñ tamām pardoñ kī dīvār haT ga.ī

rīsh-e-safed zulf-e-siyah se lipaT ga.ī

ek achchhā-ḳhāsā mard zanāne meñ ghus paḌā

goyā ki ek chor ḳhazāne meñ ghus paḌā

ladies kī safoñ meñ jo chehre the kuchh hasīn

un par nazar jamā.e hue the miyāñ-matīn

shāmil musāfiroñ meñ the har fan ke māherīn

kuchh un meñ nāzirīn the baaqī tamāsh-bēn

zauq-e-nazar kī shart thī manzar burā na thā

das paise ke ticket meñ ye picture burā na thā

gaaḌī meñ ek shor thā conductor aage chal

kah de ḳhudā ke vāste haañ Thiik hai double

kab tak khaḌā rahegā sar-e-jāda-e-amal

laḌne kī aarzū hai to bāhar zarā nikal

tujh par ḳhudā kī maar ho start kar de bus

do paise aur le le jo daulat kī hai havas

conductor ab ye kahtā thā vo bus chalā.e kyuuñ

jo bus meñ aa gayā hai kare haa.e haa.e kyuuñ

jis ko ho jaañ aziiz mirī bus meñ aa.e kyuuñ

aaise hī gul-badan the to paise bachā.e kyuuñ

Thānī hai dil meñ ab na dabeñge kisī se ham

tañg aa ga.e haiñ roz kī conductorī se ham

kahtā thā vo kisī se bhī kam-tar nahīñ huuñ maiñ

ya.anī kisī ke baap kā naukar nahīñ huuñ maiñ

public se kyuuñ Darūñ koī leader nahīñ huuñ maiñ

kyuuñ regular chalūñ mah o aḳhtar nahīñ huuñ maiñ

bus meñ khaḌe raho jo mire ḳhair-ḳhvāh ho

dekho mujhe jo duur se ibrat-nigāh ho

ye bus jo vāqa.ī thī ka.ī saal se aliil

mushkil se ek ghanTe meñ chaltī thī chaar miil

mālik ne bhī ye soch ke de dī thī is ko Dhiil

ab is kī zindagī ke haiñ lamhe bahut qalīl

ab to kisī clerk se āchānak ye jā mile

kuchh biima company se hameñ bhī silā mile

mumkin na thā ki bus se hamārā mile mizāj

jamhūriyat hai ham ko pasand aur ise nirāj

mushkil to ye hai bus kā muāvin hai kul samāj

aaise meñ kyā buland ho āvāz-e-ehtijāj

ghabrā ke ham to art kī duniyā meñ kho ga.e

jab tak maler aayā ka.ī sher ho ga.e

bus mein laTak raha tha koi haar ki tarah

koi paDa tha saya-e-diwar ki tarah

sahma hua tha koi gunahgar ki tarah

koi phansa tha murgh-e-giraftar ki tarah

mahrum ho gaya tha koi ek panw se

juta badal gaya tha kisi ka khaDaun se

koi pukarta tha meri jeb kaT gai

kahta tha koi meri nai painT phaT gai

bus mein tamam pardon ki diwar haT gai

rish-e-safed zulf-e-siyah se lipaT gai

ek achchha-KHasa mard zanane mein ghus paDa

goya ki ek chor KHazane mein ghus paDa

ladies ki safon mein jo chehre the kuchh hasin

un par nazar jamae hue the miyan-matin

shamil musafiron mein the har fan ke maherin

kuchh un mein nazirin the baqi tamash-been

zauq-e-nazar ki shart thi manzar bura na tha

das paise ke ticket mein ye picture bura na tha

gaDi mein ek shor tha conductor aage chal

kah de KHuda ke waste han Thik hai double

kab tak khaDa rahega sar-e-jada-e-amal

laDne ki aarzu hai to bahar zara nikal

tujh par KHuda ki mar ho start kar de bus

do paise aur le le jo daulat ki hai hawas

conductor ab ye kahta tha wo bus chalae kyun

jo bus mein aa gaya hai kare hae hae kyun

jis ko ho jaan aziz meri bus mein aae kyun

aaise hi gul-badan the to paise bachae kyun

Thani hai dil mein ab na dabenge kisi se hum

tang aa gae hain roz ki conductori se hum

kahta tha wo kisi se bhi kam-tar nahin hun main

yani kisi ke bap ka naukar nahin hun main

public se kyun Darun koi leader nahin hun main

kyun regular chalun mah o aKHtar nahin hun main

bus mein khaDe raho jo mere KHair-KHwah ho

dekho mujhe jo dur se ibrat-nigah ho

ye bus jo waqai thi kai sal se alil

mushkil se ek ghanTe mein chalti thi chaar mil

malik ne bhi ye soch ke de di thi is ko Dhil

ab is ki zindagi ke hain lamhe bahut qalil

ab to kisi clerk se aachanak ye ja mile

kuchh bima company se hamein bhi sila mile

mumkin na tha ki bus se hamara mile mizaj

jamhuriyat hai hum ko pasand aur ise niraj

mushkil to ye hai bus ka muawin hai kul samaj

aaise mein kya buland ho aawaz-e-ehtijaj

ghabra ke hum to art ki duniya mein kho gae

jab tak maler aaya kai sher ho gae