karachi ke machchhar

ai karachi terī raunaq aur shahroñ meñ kahāñ

machchharoñ kī bainal-aqvāmī numā.ish hai yahāñ

kis qadar ābād haiñ terī navāhī bastiyāñ

in meñ machchhar mehmāñ haiñ aur machchhar mezbāñ

machchharoñ kā shahr hai hifzān-e-sehhat kā nizām

kar rahā hai puurī puurī tandahī se apnā kaam

aur shahroñ ke bhī machchhar haiñ karachi meñ muqīm

kyūñki ab chaltī nahīñ is shahr meñ bahrī nasīm

kar diyā kartā thā paspā machchharoñ ko ye ġhanīm

tark kar dī hai havāoñ ne bhī ab rasm-e-qadīm

machchharoñ ne bāñdh rakkhī hai karachi meñ havā

in ke uupar kārgar hotī nahīñ koī davā

ai karachi ġhair mulkoñ se jo machchhar aa.e haiñ

kaise kaise tū ne un ke daad re sunvā.e haiñ

raat ko sote meñ vo kānoñ pe jab mañDlā.e haiñ

apne hī hāthoñ se thappaḌ apne muñh par khaa.e haiñ

un ko rishvat bhī agar de deñ na baaz ā.eñge vo

kaaT kar chupke se tārīkī meñ uḌ jā.eñge vo

chhoTe machchhar moTe machchhar aur baḌe haiñ aur khare

shahr ke bāzār aur ghar machchharoñ se haiñ bhare

raat din mañDlā rahe haiñ un kī faujoñ ke pare

kaan par gaate haiñ Takrā kar ye baijū bāvare

machchharoñ ko ai karachi tū ne baḳhshā hai vo chain

ḳhud ko har machchhar samajhtā hai vahī hai tansen

ho chukā hai machchharoñ par ḳhūn-e-insānī halāl

kaun un ko maar saktā hai kisī kī kyā majāl

machchharoñ kī parvarish kā ḳhaas rakhte haiñ ḳhayāl

aadmī kī jaan bach jaa.e nahīñ is kā savāl

aadmī apnī hifāzat ke agar qābil nahīñ

machchharoñ kā ḳhuun sar lene se kuchh hāsil nahīñ

niklo machchhar-dāniyāñ bāñdhe hue jab ghar se jaao

zaḳhmī ho jaa.e badan itnā ziyāda mat khujāo

jab koī machchhar tumheñ kaaTe to us kā dil baḌhāo

balki taalī bhī bajāo saath us ke mil ke gaao

machchharoñ par jāñ-nisārī ke liye sachche banū

un ke kuchh makkhan lagāo un ke tum chamche banū

machchharoñ ke kaaT lene kā sharaf hāsil ho jab

tum agar fariyād laa.e lab pe hogī be-sabab

aur likkhā jā.egā thāne meñ bhī nām-o-nasab

kuchh na bolo muñh se kahlāoge varna be-adab

machchharoñ ke pālne ko khol rakkhe haiñ gutter

''mard-e-nādāñ par kalām-e-narm-o-nāzuk be-asar''

aadmī par machchharoñ kā ye baḌā ehsān hai

ḳhuun pī lete haiñ jo sar-chashma-e-haijān hai

raat meñ bachchoñ kā chehra un kā dastar-ḳhvān hai

ashraf-e-maḳhlūq machchhar hai ki ye insān hai

aadmī marte haiñ to mar jaa.eñ par machchhar raheñ

shahr ke andar raheñ aur shahr ke bāhar raheñ

machchharoñ ko pālne vaale karachi aur salām

istifāda kar rahe haiñ machchharoñ se ḳhaas o aam

laḌte haiñ nāhaq junūbī aur shumālī vietnam

is se to behtar hai insāñ machchharoñ ke aa.eñ kaam

zindagī insāñ kī be-maqsad na honā chāhiye

ya.anī qurbānī kī koī had na honā chāhiye

ai karachi teri raunaq aur shahron mein kahan

machchharon ki bainal-aqwami numaish hai yahan

kis qadar aabaad hain teri nawahi bastiyan

in mein machchhar mehman hain aur machchhar mezban

machchharon ka shahr hai hifzan-e-sehhat ka nizam

kar raha hai puri puri tandahi se apna kaam

aur shahron ke bhi machchhar hain karachi mein muqim

kyunki ab chalti nahin is shahr mein bahri nasim

kar diya karta tha paspa machchharon ko ye ghanim

tark kar di hai hawaon ne bhi ab rasm-e-qadim

machchharon ne bandh rakkhi hai karachi mein hawa

in ke upar kargar hoti nahin koi dawa

ai karachi ghair mulkon se jo machchhar aae hain

kaise kaise tu ne un ke dad re sunwae hain

raat ko sote mein wo kanon pe jab manDlae hain

apne hi hathon se thappaD apne munh par khae hain

un ko rishwat bhi agar de den na baz aaenge wo

kaT kar chupke se tariki mein uD jaenge wo

chhoTe machchhar moTe machchhar aur baDe hain aur khare

shahr ke bazar aur ghar machchharon se hain bhare

raat din manDla rahe hain un ki faujon ke pare

kan par gate hain Takra kar ye baiju baware

machchharon ko ai karachi tu ne baKHsha hai wo chain

KHud ko har machchhar samajhta hai wahi hai tansen

ho chuka hai machchharon par KHun-e-insani halal

kaun un ko mar sakta hai kisi ki kya majal

machchharon ki parwarish ka KHas rakhte hain KHayal

aadmi ki jaan bach jae nahin is ka sawal

aadmi apni hifazat ke agar qabil nahin

machchharon ka KHun sar lene se kuchh hasil nahin

niklo machchhar-daniyan bandhe hue jab ghar se jao

zaKHmi ho jae badan itna ziyaada mat khujao

jab koi machchhar tumhein kaTe to us ka dil baDhao

balki tali bhi bajao sath us ke mil ke gao

machchharon par jaan-nisari ke liye sachche banu

un ke kuchh makkhan lagao un ke tum chamche banu

machchharon ke kaT lene ka sharaf hasil ho jab

tum agar fariyaad lae lab pe hogi be-sabab

aur likkha jaega thane mein bhi nam-o-nasab

kuchh na bolo munh se kahlaoge warna be-adab

machchharon ke palne ko khol rakkhe hain gutter

mard-e-nadan par kalam-e-narm-o-nazuk be-asar

aadmi par machchharon ka ye baDa ehsan hai

KHun pi lete hain jo sar-chashma-e-haijaan hai

raat mein bachchon ka chehra un ka dastar-KHwan hai

ashraf-e-maKHluq machchhar hai ki ye insan hai

aadmi marte hain to mar jaen par machchhar rahen

shahr ke andar rahen aur shahr ke bahar rahen

machchharon ko palne wale karachi aur salam

istifada kar rahe hain machchharon se KHas o aam

laDte hain nahaq junubi aur shumali wietnam

is se to behtar hai insan machchharon ke aaen kaam

zindagi insan ki be-maqsad na hona chahiye

yani qurbani ki koi had na hona chahiye