KHasare par KHasare ka bajaT tayyar hota hai

ḳhasāre par ḳhasāre kā bajaT tayyār hotā hai

ma.īshat kī taraqqī kā magar parchār hotā hai

tijārat jis tarah bāzār meñ kartā hai pansārī

adab meñ bhī vahī din raat kārobār hotā hai

agar marne kī Thānī hai to kyā sochā hai ye tum ne

girānī meñ kafan milnā bahut dushvār hotā hai

miyāñ jaate to ho sar par liye fariyād kī gaThrī

pata bhī hai tumheñ thāne meñ thānedār hotā hai

gile shikve se kyā hāsil ki daur-e-be-usūlī meñ

jo chaltā hai usūloñ par zalīl-o-ḳhvār hotā hai

nigāhoñ meñ jo manzar ho vahī sab kuchh nahīñ hotā

bahut kuchh aur bhī pyāre pas-e-dīvār hotā hai

Dakāreñ mārte caroñ meñ nā-kāre nazar aa.eñ

magar martā hai jo bhūkoñ koī fankār hotā hai

chalo ham bhī milā deñ apnī ḳhuddārī ko miTTī meñ

''ki daana ḳhaak meñ mil kar gul-e-gulzār hotā hai''

ḳhudī us kī bulandī kī taraf jā hī nahīñ saktī

kirāya-dār kuchh bhī ho kirāye-dār hotā hai

jo apnā bhaa.ī hai rahtā hai vo paañv kī Thokar meñ

magar jorū kā bhaa.ī to gale kā haar hotā hai

buḌhāpe meñ bhī T.V par vo āñkheñ señk lete haiñ

vo jab chāheñ hasīnoñ kā unheñ dīdār hotā hai

ḳhushāmad meñ hī aamad hai 'zafar' tū bhī ḳhushāmad kar

usī ke faiz se beḌā sabhoñ kā paar hotā hai

KHasare par KHasare ka bajaT tayyar hota hai

maishat ki taraqqi ka magar parchaar hota hai

tijarat jis tarah bazar mein karta hai pansari

adab mein bhi wahi din raat karobar hota hai

agar marne ki Thani hai to kya socha hai ye tum ne

girani mein kafan milna bahut dushwar hota hai

miyan jate to ho sar par liye fariyaad ki gaThri

pata bhi hai tumhein thane mein thanedar hota hai

gile shikwe se kya hasil ki daur-e-be-usuli mein

jo chalta hai usulon par zalil-o-KHwar hota hai

nigahon mein jo manzar ho wahi sab kuchh nahin hota

bahut kuchh aur bhi pyare pas-e-diwar hota hai

Dakaren marte caron mein na-kare nazar aaen

magar marta hai jo bhukon koi fankar hota hai

chalo hum bhi mila den apni KHuddari ko miTTi mein

ki dana KHak mein mil kar gul-e-gulzar hota hai

KHudi us ki bulandi ki taraf ja hi nahin sakti

kiraya-dar kuchh bhi ho kiraye-dar hota hai

jo apna bhai hai rahta hai wo panw ki Thokar mein

magar joru ka bhai to gale ka haar hota hai

buDhape mein bhi TV par wo aankhen senk lete hain

wo jab chahen hasinon ka unhen didar hota hai

KHushamad mein hi aamad hai 'zafar' tu bhi KHushamad kar

usi ke faiz se beDa sabhon ka par hota hai