KHwab jab se ek hasina ke nazar aane lage

ḳhvāb jab se ik hasīna ke nazar aane lage

maulvī sāhab bhī beauty parlour jaane lage

ham ko thī un se mohabbat vo bhī the ham par fidā

baat sīdhī thī magar kuchh log uljhāne lage

niim ke buuTe pe vo kyā chaḌh ga.e ki shaiḳh jī

shiddat-e-jazbāt meñ nimboliyāñ khāne lage

us kī khatiyā kab khaḌī ho jaa.e kah sakte nahīñ

āshiqī kā jis ke sar par bhuut mañDrāne lage

muft kī pī kar kahī thī ek din ham ne ġhazal

sher uTh uTh kar chachā ġhālib se Takrāne lage

bā-tarannum ham ne bas matl.a paḌhā thā bazm meñ

log jo aa.e abhī the vo bhī ghar jaane lage

yuuñ kisī se kam na the hāzir-javābī meñ magar

vo hue jab sāmne 'masrūr' haklāne lage

KHwab jab se ek hasina ke nazar aane lage

maulwi sahab bhi beauty parlour jaane lage

hum ko thi un se mohabbat wo bhi the hum par fida

baat sidhi thi magar kuchh log uljhane lage

nim ke buTe pe wo kya chaDh gae ki shaiKH ji

shiddat-e-jazbaat mein nimboliyan khane lage

us ki khatiya kab khaDi ho jae kah sakte nahin

aashiqi ka jis ke sar par bhut manDrane lage

muft ki pi kar kahi thi ek din hum ne ghazal

sher uTh uTh kar chacha ghaalib se Takrane lage

ba-tarannum hum ne bas matla paDha tha bazm mein

log jo aae abhi the wo bhi ghar jaane lage

yun kisi se kam na the hazir-jawabi mein magar

wo hue jab samne 'masrur' haklane lage