کسی شوخ سے دل لگا چاہتا ہے

کسی شوخ سے دل لگا چاہتا ہے

یہ بم اک نہ اک دن پھٹا چاہتا ہے

یہ بندہ ترا تجھ سے کیا چاہتا ہے

تری کار میں بیٹھنا چاہتا ہے

وہ آنے کو ہیں آج شب میرے گھر میں

مرا گھر نمائش بنا چاہتا ہے

مرے دل پہ دھاوے کی تیاریاں ہیں

سویڈن پہ حملہ ہوا چاہتا ہے

مری مشکلیں حل ہوا چاہتی ہیں

مرے گھر میں ریڈیو لگا چاہتا ہے

نہ مانو مری التجا کو نہ مانو

رسالے میں سب کچھ چھپا چاہتا ہے

خدا لائے وہ دن کہ وہ مجھ سے پوچھیں

ارے لق لقے‌ؔ بول کیا چاہتا ہے