kiya karte hain dildari dil-azari nahin karte

kiyā karte haiñ dildārī dil-āzārī nahīñ karte

hañsāne ke liye ham baat bāzārī nahīñ karte

mazāh-o-tanz meñ malhūz rakhte haiñ matānat ko

kabhī majrūh ham karte nahīñ lafzoñ kī hurmat ko

jo kam shādāb chehre haiñ unheñ shādāb karte haiñ

jo kam-sin haiñ bahut jhuk kar unheñ ādāb karte haiñ

ujāle ko ujālā raat ko ham raat kahte haiñ

salīqe se ba-andāz-e-digar har baat kahte haiñ

baḌhā kar baat dugunī yā kabhī tigunī nahīñ kahte

kisī kam-qad hasīna ko kabhī Thignī nahīñ kahte

kisī nāzuk badan ko ham kabhī moTī nahīñ kahte

kisī moTī se moTī ko double-roTī nahīñ kahte

jo misguide kare us ko to misguide nahīñ karte

bhalā.ī ko kisī bhī taur sab side nahīñ karte

banāte haiñ har ik māhaul ko ham pur-fazā yaaro

qabā-e-gul ko chhūte haiñ ba-andāz-e-sabā yaaro

kisī mis se jo nādānī meñ kuchh mistake ho jaa.e

duā karte haiñ nādānī bhī fāl-e-nek ho jaa.e

kiya karte hain dildari dil-azari nahin karte

hansane ke liye hum baat bazari nahin karte

mazah-o-tanz mein malhuz rakhte hain matanat ko

kabhi majruh hum karte nahin lafzon ki hurmat ko

jo kam shadab chehre hain unhen shadab karte hain

jo kam-sin hain bahut jhuk kar unhen aadab karte hain

ujale ko ujala raat ko hum raat kahte hain

saliqe se ba-andaz-e-digar har baat kahte hain

baDha kar baat duguni ya kabhi tiguni nahin kahte

kisi kam-qad hasina ko kabhi Thigni nahin kahte

kisi nazuk badan ko hum kabhi moTi nahin kahte

kisi moTi se moTi ko double-roTi nahin kahte

jo misguide kare us ko to misguide nahin karte

bhalai ko kisi bhi taur sab side nahin karte

banate hain har ek mahaul ko hum pur-faza yaro

qaba-e-gul ko chhute hain ba-andaz-e-saba yaro

kisi mis se jo nadani mein kuchh mistake ho jae

dua karte hain nadani bhi fal-e-nek ho jae