kutton ka mushaera

ik shab ko ek naale pe merā guzar huā

kuttoñ kā mun.aqid thā jahāñ ik mushā.era

''buġh'' kā janāb-e-sadr ne misra.a jo ik diyā

bhauñ-bhauñ kī gaTkarī pe sabhoñ ne uThā liyā

vo bait shaiḳh-ghesū kī kutiyāñ ne jhaaḌ dī

chit sāma.īn ho ga.e mahfil ukhāḌ dī

kutiyāñ thiiñ nau-javān ka.ī shā.erāt meñ

kuchh shā.er-e-karām the vaañ un kī ghaat meñ

bhauñ-bhauñ kī dhuum jabki machī kā.enāt meñ

do-chār un ko le uḌe chupke se raat meñ

kuchh to talāsh-e-yār meñ dam toḌne lage

ushshāq un kī yaad meñ sar phoḌne lage

ḳhārish-zada siyāh thī ik un meñ besvā

har saañs se nikaltī thī jis ke huā-huā

desī zabāñ meñ fiT thā vilāyat kā TeTuā

ghigghī bañdhī thī logoñ ke ausān the ḳhatā

haibat se ghoñsloñ meñ the taa.ir chhupe hue

maaoñ kī chhātiyoñ se the bachche lage hue

ik chaukīdār paas se guzrā jo nā-gahāñ

dam kā lañgoT bāñdh ke kutte hue ravāñ

koh o daman meñ guuñj ga.ī har taraf fuġhāñ

peñ-peñ kī soz-o-sāz meñ sab se ravāñ ravāñ

DañDā shaqī kā chaar taraf ghūmne lagā

jo zad meñ aa gayā vo zamīñ chūmne lagā

ek shab ko ek nale pe mera guzar hua

kutton ka munaqid tha jahan ek mushaera

bugh ka janab-e-sadr ne misra jo ek diya

bhaun-bhaun ki gaTkari pe sabhon ne uTha liya

wo bait shaiKH-ghesu ki kutiyan ne jhaD di

chit samain ho gae mahfil ukhaD di

kutiyan thin nau-jawan kai shaeraat mein

kuchh shaer-e-karam the wan un ki ghat mein

bhaun-bhaun ki dhum jabki machi kaenat mein

do-chaar un ko le uDe chupke se raat mein

kuchh to talash-e-yar mein dam toDne lage

ushshaq un ki yaad mein sar phoDne lage

KHarish-zada siyah thi ek un mein beswa

har sans se nikalti thi jis ke hua-hua

desi zaban mein fiT tha wilayat ka TeTua

ghigghi bandhi thi logon ke ausan the KHata

haibat se ghonslon mein the tair chhupe hue

maon ki chhatiyon se the bachche lage hue

ek chaukidar pas se guzra jo na-gahan

dam ka langoT bandh ke kutte hue rawan

koh o daman mein gunj gai har taraf fughan

pen-pen ki soz-o-saz mein sab se rawan rawan

DanDa shaqi ka chaar taraf ghumne laga

jo zad mein aa gaya wo zamin chumne laga