kutton ki conference

ek din aḳhbār meñ kuchh yuuñ ḳhabar thī besh-o-kam

ek ghar meñ ek hī din saat bachchoñ kā janam

is ajūba par hazāroñ tabsire hone lage

jitne ġhairat-dār kutte the vo sab rone lage

shiddat-e-ġham se har ik kutte ko tap chaḌhne lagā

bole ab insāñ hamārī ham-sarī karne lagā

ek kuttā to yahāñ tak kah gayā jazbāt meñ

kyā himāqat kī hai is ne aaj ke hālāt meñ

jab ki saarī qaum ke aage hai roTī kā savāl

aaj hī ke daur meñ is ko dikhānā thā kamāl

is ko lenā thā jo ham kuttoñ kī sohbat kā asar

aur bhī kuchh ḳhūbiyāñ thiiñ un pe karnī thī nazar

sab se pahle ye usūl-e-zindagānī sīkhtā

kis tarah hotī hai ghar kī pāsbānī sīkhtā

sab se pahle ham se lenā thā ise dars-e-vafā

aaj tak ye jis se be-bahra hai aur nā-āshnā

faqr-o-fāqa sīkhtā letā qanā.at kā sabaq

ham se pahle is ko lenā thā mohabbat kā sabaq

mutma.in haiñ ġhair is se aur na ḳhud is ke aziiz

ham ki rakhte haiñ sadā apne parā.e kī tamīz

ye jise bhī mārtā hai mārtā hai ban ke yaar

ham kisī par bhī nahīñ karte kabhī chupke se vaar

ham chhupāte haiñ na kaalā dhan na karte haiñ black

ham musalmāñ haiñ na hindū, hai hamārā dharm ek

ham kisī kā bhī namak khā kar nahīñ karte harām

ba musalmāñ allāh allāh yā barhaman raam raam

ham ki mai-noshī hī karte haiñ na ham piite haiñ bhañg

ham meñ haDDī Daal kar insān karvātā hai jañg

phir bhī apnī jañg ko ham mustaqil karte nahīñ

us kī tarah muddatoñ kashmīr meñ laḌte nahīñ

ashraf-e-maḳhlūq kaise paḌ gayā thā is kā naam

kyā nahīñ ai sāthiyo! ye Duub marne kā maqām

ye kare chorī pata ham se lagātī hai police

ham batāte haiñ to us ko khīñch laatī hai police

kaun sī phir fauqiyat hai aaj ke insān meñ

ham se aage kab ye pahuñchā hai kisī maidān meñ

har musībat har balā meñ is se pahle ham ga.e

intihā ye hai ḳhalā meñ is se pahle ham ga.e

ham bhī hote haiñ kabhī fitrī taqāzoñ ke shikār

sinf-e-nāzuk ko magar rakhte nahīñ sar pe savār

ik hamāre vāste qudrat ne rakkhā hai nizām

raat din ham nasl-sāzī kā nahīñ karte haiñ kaam

baat kyā sochī hameñ nīchā dikhāne ke liye

hirs bhī karne chalā bachche banāne ke liye

ek din aKHbar mein kuchh yun KHabar thi besh-o-kam

ek ghar mein ek hi din sat bachchon ka janam

is ajuba par hazaron tabsire hone lage

jitne ghairat-dar kutte the wo sab rone lage

shiddat-e-gham se har ek kutte ko tap chaDhne laga

bole ab insan hamari ham-sari karne laga

ek kutta to yahan tak kah gaya jazbaat mein

kya himaqat ki hai is ne aaj ke haalat mein

jab ki sari qaum ke aage hai roTi ka sawal

aaj hi ke daur mein is ko dikhana tha kamal

is ko lena tha jo hum kutton ki sohbat ka asar

aur bhi kuchh KHubiyan thin un pe karni thi nazar

sab se pahle ye usul-e-zindagani sikhta

kis tarah hoti hai ghar ki pasbani sikhta

sab se pahle hum se lena tha ise dars-e-wafa

aaj tak ye jis se be-bahra hai aur na-ashna

faqr-o-faqa sikhta leta qanaat ka sabaq

hum se pahle is ko lena tha mohabbat ka sabaq

mutmain hain ghair is se aur na KHud is ke aziz

hum ki rakhte hain sada apne parae ki tamiz

ye jise bhi marta hai marta hai ban ke yar

hum kisi par bhi nahin karte kabhi chupke se war

hum chhupate hain na kala dhan na karte hain black

hum musalman hain na hindu, hai hamara dharm ek

hum kisi ka bhi namak kha kar nahin karte haram

ba musalman allah allah ya barhaman ram ram

hum ki mai-noshi hi karte hain na hum pite hain bhang

hum mein haDDi Dal kar insan karwata hai jang

phir bhi apni jang ko hum mustaqil karte nahin

us ki tarah muddaton kashmir mein laDte nahin

ashraf-e-maKHluq kaise paD gaya tha is ka nam

kya nahin ai sathiyo! ye Dub marne ka maqam

ye kare chori pata hum se lagati hai police

hum batate hain to us ko khinch lati hai police

kaun si phir fauqiyat hai aaj ke insan mein

hum se aage kab ye pahuncha hai kisi maidan mein

har musibat har bala mein is se pahle hum gae

intiha ye hai KHala mein is se pahle hum gae

hum bhi hote hain kabhi fitri taqazon ke shikar

sinf-e-nazuk ko magar rakhte nahin sar pe sawar

ek hamare waste qudrat ne rakkha hai nizam

raat din hum nasl-sazi ka nahin karte hain kaam

baat kya sochi hamein nicha dikhane ke liye

hirs bhi karne chala bachche banane ke liye