kya un ko dil ka haal sunane se faeda

kyā un ko dil kā haal sunāne se fā.eda

hogā to hogā note dikhāne se fā.eda

nok-e-mizha jo dil meñ chubhī dil phaḌak uThā

kuchh to huā hai Tiika karāne se fā.eda

dil gum hai apnā chor kā lekin pata nahīñ

āshiq ko kyā police ke thāne se fā.eda

ma.alūm hai dikhāte haiñ vo ham ko sabz-bāġh

lawrence-bāġh shaam ko jaane se fā.eda

ab bhī vo kah rahe haiñ ki mere buzurg ho

kuchh bhī huā na shave karāne se fā.eda

jo nīche jeb ke hai mirī jaañ use churā

āshiq kā fountain churāne se fā.eda

'laq-laq' zamāna ham se uThātā hai fā.ede

ham ne na kuchh uThāyā zamāne se fā.eda

kya un ko dil ka haal sunane se faeda

hoga to hoga note dikhane se faeda

nok-e-mizha jo dil mein chubhi dil phaDak uTha

kuchh to hua hai Tika karane se faeda

dil gum hai apna chor ka lekin pata nahin

aashiq ko kya police ke thane se faeda

malum hai dikhate hain wo hum ko sabz-bagh

lawrence-bagh sham ko jaane se faeda

ab bhi wo kah rahe hain ki mere buzurg ho

kuchh bhi hua na shawe karane se faeda

jo niche jeb ke hai meri jaan use chura

aashiq ka fountain churane se faeda

'laq-laq' zamana hum se uThata hai faede

hum ne na kuchh uThaya zamane se faeda