laila majnun ki shadi

ek sāhib ne kiyā hai radio par ye savāl

qais agar lailā kā bar hotā to kyā hotā ma.aal

ham ye kahte haiñ ye istifsār qabl-az-vaqt hai

kyuuñ nahīñ tai paa.ī shādī pahle ye kar liije tai

ālimoñ ke muḳhtalif aqvāl haiñ is baab meñ

muḳhtalif bahseñ huī haiñ halqa-e-ahbāb meñ

ik rivāyat ye bhī hai lailā se ghabrātā thā qais

manzil-e-shādī se ghabrā kar guzar jaatā thā qais

ek rivāyat ye bhī hai vo byaah ke qābil na thā

varna lailā ko bhagā lenā koī mushkil na thā

ik rivāyat ye bhī hai lailā kī maañ thī bad-chalan

vo to banñā chāhtī thī ḳhud hī majnūñ kī dulhan

ik rivāyat ye bhī hai hālāñki hai to kuchh za.iif

ḳhāndānī taur par majnūñ nahīñ thā kuchh sharīf

ye bhī kahte haiñ ki majnūñ byaah ko raazī na thā

ye bhī sunte haiñ ki sahrā meñ koī qaazī na thā

ik rivāyat ye bhī hai jhūTe haiñ sab 'faiz' o 'firāq'

likhne vāloñ ne kiyā hai paḌhne vāloñ se mazāq

ek rivāyat ye bhī hai jhagḌe kā baa.is thā jahez

hazrat-e-lailā ke ghar meñ koī kursī thī na mez

ye bhī sunte haiñ ki jab lailā ke ghar pahuñchī barāt

mādar-e-lailā ne ḳhud hī rok dī shādī kī baat

dekh kar majnūñ kā chehra us kī side aur back

mādar-e-lailā ne farmāyā ye laḌkā hai crack

ye nahīñ karne kā shādī kiije merā e'tibār

mujh se shādī ko bhī aayā thā yahī ummīd-vār

ālimoñ ke darmiyāñ jab is qadar ho iḳhtilāf

aap hī kahiye ye qissa kyā samajh meñ aa.e saaf

ek sahib ne kiya hai radio par ye sawal

qais agar laila ka bar hota to kya hota maal

hum ye kahte hain ye istifsar qabl-az-waqt hai

kyun nahin tai pai shadi pahle ye kar lije tai

aalimon ke muKHtalif aqwal hain is bab mein

muKHtalif bahsen hui hain halqa-e-ahbab mein

ek riwayat ye bhi hai laila se ghabraata tha qais

manzil-e-shadi se ghabra kar guzar jata tha qais

ek riwayat ye bhi hai wo byah ke qabil na tha

warna laila ko bhaga lena koi mushkil na tha

ek riwayat ye bhi hai laila ki man thi bad-chalan

wo to banna chahti thi KHud hi majnun ki dulhan

ek riwayat ye bhi hai haalanki hai to kuchh zaif

KHandani taur par majnun nahin tha kuchh sharif

ye bhi kahte hain ki majnun byah ko raazi na tha

ye bhi sunte hain ki sahra mein koi qazi na tha

ek riwayat ye bhi hai jhuTe hain sab 'faiz' o 'firaq'

likhne walon ne kiya hai paDhne walon se mazaq

ek riwayat ye bhi hai jhagDe ka bais tha jahez

hazrat-e-laila ke ghar mein koi kursi thi na mez

ye bhi sunte hain ki jab laila ke ghar pahunchi baraat

madar-e-laila ne KHud hi rok di shadi ki baat

dekh kar majnun ka chehra us ki side aur back

madar-e-laila ne farmaya ye laDka hai crack

ye nahin karne ka shadi kije mera e'tibar

mujh se shadi ko bhi aaya tha yahi ummid-war

aalimon ke darmiyan jab is qadar ho iKHtilaf

aap hi kahiye ye qissa kya samajh mein aae saf