mashuq jo Thigna hai to aashiq bhi hai naTa

ma.ashūq jo Thignā hai to āshiq bhī hai naaTā

us kā koī nuqsān na is ko koī ghāTā

terī to navāzish hai ki tū aa gayā lekin

ai dost mire ghar meñ na chāval hai na aaTā

laDDan to honeymōn manāne ga.e london

chal ham bhī clifton pe kareñ sair-sapāTā

tum ne to kahā thā ki chalo Duub mareñ ham

ab sāhil-e-dariyā pe khaḌe karte ho Tā-Tā

ushshāq rah-e-ishq meñ mohtāt raheñge

sīkhā hai hasīnoñ ne bhī ab jūdo-karāTā

kaalā na sahī laal sahī til to banā hai

achchhā huā machchhar ne tire gaal pe kaaTā

is zor se chheḌā to nahīñ thā use maiñ ne

jis zor se zālim ne jamāyā hai chamāTā

jab us ne bulāyā to 'ziyā' chal diye ghar se

bistar ko rakhā sar pe lapeTā na lapāTā

mashuq jo Thigna hai to aashiq bhi hai naTa

us ka koi nuqsan na is ko koi ghaTa

teri to nawazish hai ki tu aa gaya lekin

ai dost mere ghar mein na chawal hai na aaTa

laDDan to honeymoon manane gae london

chal hum bhi clifton pe karen sair-sapaTa

tum ne to kaha tha ki chalo Dub maren hum

ab sahil-e-dariya pe khaDe karte ho Ta-Ta

ushshaq rah-e-ishq mein mohtat rahenge

sikha hai hasinon ne bhi ab judo-karaTa

kala na sahi lal sahi til to bana hai

achchha hua machchhar ne tere gal pe kaTa

is zor se chheDa to nahin tha use main ne

jis zor se zalim ne jamaya hai chamaTa

jab us ne bulaya to 'ziya' chal diye ghar se

bistar ko rakha sar pe lapeTa na lapaTa