machanic shaer

baiThe baiThe dil meñ ik shā.er ke aayā ye ḳhayāl

shā.irī se baḌh ke bhī duniyā ko dikhlā.e kamāl

raushnī meñ ''shams'' kī DhūñDā to sāñcha mil gayā

ittifāqan us ko ik motor kā Dhāñcha mil gayā

tube tyre burst aur engine kī hālat thī ḳharāb

bajte the midguard jaise bajte haiñ chañg-o-rabāb

kuchh clutch meñ thī ḳharābī aur TuuTe the break

sar se pā tak screw Dhīlā thā us kā ek ek

us ke bearing gal chuke the aur gudgeon-pin the ḳharāb

yaanī sūraj kī tarah Dhaltā hī jaatā thā shabāb!

rāste se us ke logoñ ko haTāne se thā kaam

yuuñ sivā.e horn ke bajte the kal-purze tamām

aur ye aalam thā jahāñ bhī roknā maqsūd ho

bas isī andāz se petrol is meñ Daal do

yā kisī bijlī ke khambe hī se Takrā do ise

do tarīqoñ meñ se jaise chāho Thahrā lo ise

jab huī start to samjho qayāmat aa ga.ī

jo bhī is motor meñ baiThā us kī shāmat aa ga.ī

baiThne vāloñ kā aksar raah meñ hotā thā khel!

ek kahtā thā ki haañ maiñ baiThtā huuñ tū dhakel!

us ke kal-purze bhī aur sāmān bhī kam-yāb thā

us kā order hī meñ aa jaanā ḳhayāl-o-ḳhvāb thā

jis ne is motor ko dekhā aql us kī ḳhabt thii!

sochte the dil meñ ye hazrat ki ab kyā kījiye

al-ġharaz tai kar liyā purzoñ kā chandā kījiye

axel to ford se piston bhī citeron se liye

aur ḳhushāmad karke tyre tube michelon se liye

maañg lī body fiat se aur purze bhī mile

radiator austin se horn cheverlet se

batri to buke kī lī aur cylinder dodge kaa!

ik purānā magnet studebaker ne diyā

auckland kā bhī purānā sā gear-box aa gayā

tan ke dhakne ke liye morris kā bonnet chhā gayā

haañ hamārī bicycle ne bhī kiyā ye kār-e-nek

rahm khā kar us ko apne de diye donoñ break

saare kal-purze farāham ho chuke jab ek saath

un ke fiT karne ko uTThā shā.ir-e-rañgīñ kā haath

raat ko do do baje tak Thokā-pīTī se thā kaam

jis ke baa.is niind ham-sāyoñ kī hotī thī harām

ek be-jāñ chiiz se sachchī mohabbat dekh kar

rah ga.e hairat meñ sab shā.er kī jiddat dekh kar

baat bigḌī thī kahāñ par aur kahāñ par ban ga.ī

is tarah se 'doctor-yāvar' kī motor ban ga.ī

baiThe baiThe dil mein ek shaer ke aaya ye KHayal

shairi se baDh ke bhi duniya ko dikhlae kamal

raushni mein shams ki DhunDa to sancha mil gaya

ittifaqan us ko ek motor ka Dhancha mil gaya

tube tyre burst aur engine ki haalat thi KHarab

bajte the midguard jaise bajte hain chang-o-rabab

kuchh clutch mein thi KHarabi aur TuTe the break

sar se pa tak screw Dhila tha us ka ek ek

us ke bearing gal chuke the aur gudgeon-pin the KHarab

yani suraj ki tarah Dhalta hi jata tha shabab!

raste se us ke logon ko haTane se tha kaam

yun siwae horn ke bajte the kal-purze tamam

aur ye aalam tha jahan bhi rokna maqsud ho

bas isi andaz se petrol is mein Dal do

ya kisi bijli ke khambe hi se Takra do ise

do tariqon mein se jaise chaho Thahra lo ise

jab hui start to samjho qayamat aa gai

jo bhi is motor mein baiTha us ki shamat aa gai

baiThne walon ka aksar rah mein hota tha khel!

ek kahta tha ki han main baiThta hun tu dhakel!

us ke kal-purze bhi aur saman bhi kam-yab tha

us ka order hi mein aa jaana KHayal-o-KHwab tha

jis ne is motor ko dekha aql us ki KHabt thi!

sochte the dil mein ye hazrat ki ab kya kijiye

al-gharaz tai kar liya purzon ka chanda kijiye

axel to ford se piston bhi citeron se liye

aur KHushamad karke tyre tube michelon se liye

mang li body fiat se aur purze bhi mile

radiator austin se horn chewerlet se

batri to buke ki li aur cylinder dodge ka!

ek purana magnet studebaker ne diya

auckland ka bhi purana sa gear-box aa gaya

tan ke dhakne ke liye morris ka bonnet chha gaya

han hamari bicycle ne bhi kiya ye kar-e-nek

rahm kha kar us ko apne de diye donon break

sare kal-purze faraham ho chuke jab ek sath

un ke fiT karne ko uTTha shair-e-rangin ka hath

raat ko do do baje tak Thoka-piTi se tha kaam

jis ke bais nind ham-sayon ki hoti thi haram

ek be-jaan chiz se sachchi mohabbat dekh kar

rah gae hairat mein sab shaer ki jiddat dekh kar

baat bigDi thi kahan par aur kahan par ban gai

is tarah se 'doctor-yawar' ki motor ban gai