mausiqi se ilaj

ik muhaqqiq ne na.ī tahqīq farmā dī hai aaj

fann-e-mausīqī se bhī mumkin hai insānī ilaaj

sach hai ye daavā to ruḳhsat ai atibbā-e-kirām

mustagī ko bandagī qurs-e-mullayan ko salām

ab mudāvā-e-maraz hogā na.e andāz se

ab huvashshāfī kī āvāz aa.egī har saaz se

ab to nauTañgī hī meñ hogā ilāj-e-sāma.īn

al-firāq ai gul-banafsha alvidā ai nisaplin

nāmvar qavvāl puure doctor ho jā.eñge

sirf sāzinde jo haiñ compaundar ho jā.eñge

un davā-ḳhānoñ pe aise board ā.eñge nazar

mutrib-e-ātish-navā miss-nāz lady doctor

tharmameter kī jagah muñh meñ lagā kar bāñsurī

doctor dekhegā kyā hālat hai ab bīmār kī

maut bhī us shaḳhs tak aate hue ghabrā.egī

jis ke sar par naza.a meñ Daflī bajā.ī jā.egī

chūñki nusḳhoñ meñ ri.āyat hogī sirf ash.ār kī

sirf shā.er ko jagah dī jā.egī attār kī

paḌ ga.e ma.ajūn meñ kiiḌe ḳhamīra saḌ gayā

bū-alī-sīnā kī ummīdoñ pe paanī paḌ gayā

hazrat-e-'ajmal' ke jaadū kā asar zaa.il huā

aadmī 'fayyāz'-ḳhāñ ke art kā qaa.il huā

is ko kahte haiñ ḳhudā kī den ye hotī hai den

ab civil-surgeon banegā jānashīn-e-tān-sen

ab atibbā bhī nazar ā.eñge shahnā.ī-ba-dast

sharbat-e-unnāb kī botal ko paiġhām-e-shikast

un se kah do mubtalā haiñ jo kisī āzār meñ

ab shifā-ḳhāne khuleñge husn ke bāzār meñ

qabz ke maare hue bīmār ko kar do ḳhabar

ek Thumrī meñ hai itrifal zamānī kā asar

ab to aḳhbāroñ meñ shaa.e hoñge aise ishtihār

jumla amrāz-e-ḳhusūsī kī davā tabla sitār

jumla amrāz-e-ḳhabīsa kī davā-e-kārgar

naġhma-e-sāhir ba-āvāz-e-lata-mangeshkar

zo.af-e-me.ada hai to miss-kajjan kī qavvālī suno

ḳhushk khāñsī hai to nazm-e-hazrat-e-'hālī' suno

kyā zarūrī hai ki pechish kī davā ho aspaġhol

adviya to aur bhī haiñ biin baajā band Dhol

iḳhtilāj-e-qalb kī vāhid davā hai aaj kal

'bekal-utsāhī' se suniye ai mirī jān-e-ġhazal

is tarah nusḳha likhegā chāra-sāz-e-nabz-bīñ

dādrā das baara Thumrī do adad ek bhairvīñ''

sub.h-dam misl-e-shakīla mashq-e-qavvālī kunand

ḳhāk-e-pā-e-mushtarī-bā.ī ba-vaqt-e-shab ḳhūrand

ek muhaqqiq ne nai tahqiq farma di hai aaj

fann-e-mausiqi se bhi mumkin hai insani ilaj

sach hai ye dawa to ruKHsat ai atibba-e-kiram

mustagi ko bandagi qurs-e-mullayan ko salam

ab mudawa-e-maraz hoga nae andaz se

ab huwashshafi ki aawaz aaegi har saz se

ab to nauTangi hi mein hoga ilaj-e-samain

al-firaq ai gul-banafsha alwida ai nisaplin

namwar qawwal pure doctor ho jaenge

sirf sazinde jo hain compaundar ho jaenge

un dawa-KHanon pe aise board aaenge nazar

mutrib-e-atish-nawa miss-naz lady doctor

tharmameter ki jagah munh mein laga kar bansuri

doctor dekhega kya haalat hai ab bimar ki

maut bhi us shaKHs tak aate hue ghabraegi

jis ke sar par naza mein Dafli bajai jaegi

chunki nusKHon mein riayat hogi sirf ashaar ki

sirf shaer ko jagah di jaegi attar ki

paD gae majun mein kiDe KHamira saD gaya

bu-ali-sina ki ummidon pe pani paD gaya

hazrat-e-'ajmal' ke jadu ka asar zail hua

aadmi 'fayyaz'-KHan ke art ka qail hua

is ko kahte hain KHuda ki den ye hoti hai den

ab ciwil-surgeon banega jaanashin-e-tan-sen

ab atibba bhi nazar aaenge shahnai-ba-dast

sharbat-e-unnab ki botal ko paigham-e-shikast

un se kah do mubtala hain jo kisi aazar mein

ab shifa-KHane khulenge husn ke bazar mein

qabz ke mare hue bimar ko kar do KHabar

ek Thumri mein hai itrifal zamani ka asar

ab to aKHbaron mein shae honge aise ishtihaar

jumla amraaz-e-KHususi ki dawa tabla sitar

jumla amraaz-e-KHabisa ki dawa-e-kargar

naghma-e-sahir ba-awaz-e-lata-mangeshkar

zoaf-e-meada hai to miss-kajjan ki qawwali suno

KHushk khansi hai to nazm-e-hazrat-e-'haali' suno

kya zaruri hai ki pechish ki dawa ho aspaghol

adwiya to aur bhi hain bin baja band Dhol

iKHtilaj-e-qalb ki wahid dawa hai aaj kal

'bekal-utsahi' se suniye ai meri jaan-e-ghazal

is tarah nusKHa likhega chaara-saz-e-nabz-bin

dadra das bara Thumri do adad ek bhairwin

subh-dam misl-e-shakila mashq-e-qawwali kunand

KHak-e-pa-e-mushtari-bai ba-waqt-e-shab KHurand