maut

jāgeñ kabhī na aisā sulātī hai vaqt par

shāh-o-faqīr sab ko uThātī hai vaqt par

mumkin hai kisī vaqt vo be-vaqt hañsā de

ye baat magar tai hai rulātī hai vaqt par

sab us ko uñgliyoñ pe nachāte rahe magar

tigunī kā naach vo bhī nachātī hai vaqt par

pal-bhar bhī kaam hone pe ruktī nahīñ kabhī

aatī hai jaise vaise hī jaatī hai vaqt par

umr-e-ravāñ ke saath vo rahtī hai umr-bhar

bas ek baar ruuTh ke jaatī hai vaqt par

anjām us kā bā.is-e-ibrat ho is liye

ho gar burā koī to satātī hai vaqt par

jo dar-ba-dar hai āḳhirī manzil kī khoj meñ

us ko bhī sīdhī raah dikhātī hai vaqt par

stage par dikhā ke na.e khel tamāshe

parda vo zindagī kā girātī hai vaqt par

hai maut bhī ajiib hī ma.ashūq 'ḳhvāh-maḳhvāh'

va.ada kiye baġhair bhī aatī hai vaqt par

jagen kabhi na aisa sulati hai waqt par

shah-o-faqir sab ko uThati hai waqt par

mumkin hai kisi waqt wo be-waqt hansa de

ye baat magar tai hai rulati hai waqt par

sab us ko ungliyon pe nachate rahe magar

tiguni ka nach wo bhi nachati hai waqt par

pal-bhar bhi kaam hone pe rukti nahin kabhi

aati hai jaise waise hi jati hai waqt par

umr-e-rawan ke sath wo rahti hai umr-bhar

bas ek bar ruTh ke jati hai waqt par

anjam us ka bais-e-ibrat ho is liye

ho gar bura koi to satati hai waqt par

jo dar-ba-dar hai aaKHiri manzil ki khoj mein

us ko bhi sidhi rah dikhati hai waqt par

stage par dikha ke nae khel tamashe

parda wo zindagi ka giraati hai waqt par

hai maut bhi ajib hi mashuq 'KHwah-maKHwah'

wada kiye baghair bhi aati hai waqt par