mera intiKHabi manshur

ḳhushā ai votaro lo maiñ bhī ik manshūr laayā huuñ

tamannāoñ kī bhūrī bairiyoñ par bor laayā huuñ

maiñ apnī ḳhud-kashīda bhaap par āzād laḌtā huuñ

akelā saare ustādoñ se be-ustād laḌtā huuñ

raqīboñ ko bharosā hogā apne kārnāmoñ par

mujhe hai faḳhr apne māhir-e-fan ḳhān-sāmoñ par

har ik dil-band hājat-mand ko ḳhursand kar dūñgā

galī kūche kī gandī nāliyoñ ko band kar dūñgā

''bajaT'' maiñ kam se kam rakkhūñgā ḳharcha kār-ḳhānoñ kā

magar thamne na dūñgā ġhalġhala filmī tarānoñ kā

mirī jān-e-hazīñ kā bār-e-ġham halkā nahīñ hogā!

ki jab tak har galī ke moḌ par niklā nahīñ hogā

na.e uslūb se juz-bandi-e-kār-e-jahāñ hogī

mire sab votaroñ ke ghar meñ ''ratoin'' kī dukāñ hogī

guzishta do sadī se saḳht ''texa.e'' ga.e ho tum

ab āsā.ish kī jānib gher kar laa.e ga.e ho tum

karūñgā aur bhī patlī qabā.eñ nāznīnoñ kī

madāris meñ raheñgī chhuTTiyāñ baara mahīnoñ kī

classeñ hī na jab hoñgī to vo kis ko paḌhā.egā

hamāre daur meñ teacher faqat tanḳhvāh pā.egā

rivāyāt-e-kasād-o-kāhilī chamkā.ī jā.eñgī!

javāñ-mardoñ kī zulfeñ paañv tak laTkā.ī jā.eñgī

havālāteñ to kuchh hoñgī magar ''thāne'' nahīñ hoñge

pareshānī ke uupar ye ''pareshāne'' nahīñ hoñge

ye khaa.e roTiyāñ merī vo noche boTiyāñ merī

chaman meñ har taraf uḌtī huī lañgoTiyāñ merī

KHusha ai wotaro lo main bhi ek manshur laya hun

tamannaon ki bhuri bairiyon par bor laya hun

main apni KHud-kashida bhap par aazad laDta hun

akela sare ustadon se be-ustad laDta hun

raqibon ko bharosa hoga apne karnamon par

mujhe hai faKHr apne mahir-e-fan KHan-samon par

har ek dil-band hajat-mand ko KHursand kar dunga

gali kuche ki gandi naliyon ko band kar dunga

bajaT main kam se kam rakkhunga KHarcha kar-KHanon ka

magar thamne na dunga ghalghala filmi taranon ka

meri jaan-e-hazin ka bar-e-gham halka nahin hoga!

ki jab tak har gali ke moD par nikla nahin hoga

nae uslub se juz-bandi-e-kar-e-jahan hogi

mere sab wotaron ke ghar mein ratoin ki dukan hogi

guzishta do sadi se saKHt texae gae ho tum

ab aasaish ki jaanib gher kar lae gae ho tum

karunga aur bhi patli qabaen nazninon ki

madaris mein rahengi chhuTTiyan bara mahinon ki

classen hi na jab hongi to wo kis ko paDhaega

hamare daur mein teacher faqat tanKHwah paega

riwayat-e-kasad-o-kahili chamkai jaengi!

jawan-mardon ki zulfen panw tak laTkai jaengi

hawalaten to kuchh hongi magar thane nahin honge

pareshani ke upar ye pareshane nahin honge

ye khae roTiyan meri wo noche boTiyan meri

chaman mein har taraf uDti hui langoTiyan meri