mir o ghaalib

ek shā.er ne ġhazal bhejī kisī aḳhbār meñ

taaki shohrat ho adab ke mo'tabar bāzār meñ

kuchh dinoñ to us ko chhapne kā rahā ik intizār

pahuñchā āḳhir mālik-e-aḳhbār ke darbār meñ

ho ke barham jaate hī shikva editor se kiyā

ye to batlā.eñ kamī kyā thī mere ash.ār meñ?

aap ko ye kyā ḳhabar thā mujh ko kitnā iztirāb

niiñd haftoñ tak na aa.ī dīda-e-bedār meñ

ye editor ne kahā maiñ chhāptā kaise ġhazal?

vo bulandī hī na thī jo chāhiye afkār meñ

sher koī ḳhāna-e-dil meñ utartā hī nahīñ

nā musībat ye kamī hai kāvish-e-fankār meñ

jis ko kahtā hai zamāna ġhair-meyārī kalām

chhap nahīñ saktā kabhī hargiz mire aḳhbār meñ

sun ke is remark ko maġhmūm shā.er ne kahā

'mīr' o 'ġhālib' bhī nahīñ kuchh aap ke darbār meñ

kulliyāt-e-'mīr'-o-'ġhālib' se ġhazal laayā thā maiñ

aaj vo bhī chhap na paa.ī aap ke aḳhbār meñ!

ek shaer ne ghazal bheji kisi aKHbar mein

taki shohrat ho adab ke mo'tabar bazar mein

kuchh dinon to us ko chhapne ka raha ek intizar

pahuncha aaKHir malik-e-aKHbar ke darbar mein

ho ke barham jate hi shikwa editor se kiya

ye to batlaen kami kya thi mere ashaar mein?

aap ko ye kya KHabar tha mujh ko kitna iztirab

nind hafton tak na aai dida-e-bedar mein

ye editor ne kaha main chhapta kaise ghazal?

wo bulandi hi na thi jo chahiye afkar mein

sher koi KHana-e-dil mein utarta hi nahin

na musibat ye kami hai kawish-e-fankar mein

jis ko kahta hai zamana ghair-meyari kalam

chhap nahin sakta kabhi hargiz mere aKHbar mein

sun ke is remark ko maghmum shaer ne kaha

'mir' o 'ghaalib' bhi nahin kuchh aap ke darbar mein

kulliyat-e-'mir'-o-'ghaalib' se ghazal laya tha main

aaj wo bhi chhap na pai aap ke aKHbar mein!