miyan ke dost

aa.e miyāñ ke dost to aate chale ga.e

chhoTe se ek ghar meñ samāte chale ga.e

vo qahqahe lage ki chhateñ ghar kī uḌ ga.iiñ

buniyād saare ghar kī hilāte chale ga.e

bakvās un kī sun ke shayātīn ro paḌe

royā jo ek sab ko rulāte chale ga.e

naukar ne aaj chaa.e ke dariyā bahā diye

dariyā samundaroñ meñ samāte chale ga.e

almāriyoñ meñ saham ga.e biskiToñ ke Tan

chun chun ke ek ek ko khāte chale ga.e

khāne kī chīzeñ nādir-o-nāyāb ho ga.iiñ

dillī kā qatl-e-ām machāte chale ga.e

sheroñ kī tarah TuuT paḌe aa ke mez par

jo chiiz bhī milī vo chabāte chale ga.e

jaise police-man pakaḌtā hai chor ko

har shai pakaḌ ke peT meñ laate chale ga.e

engine kī tarah muñh se ugalte rahe dhuāñ

aur sigreToñ kī raakh girāte chale ga.e

har samt pheñk pheñk ke māchis kī tīliyāñ

kuuḌe kā farsh ghar meñ bichhāte chale ga.e

kamre meñ ghūmte hue kīchaḌ-bhare vo boot

qālīn ke nasīb jagāte chale ga.e

dīvāroñ se Tike rahe chupḌe hue vo sar

har naqsh-e-mā-sivā ko miTāte chale ga.e

āvāzeñ ''āḳh thūḳh'' kī hotī rahīñ buland

so.e hue guloñ ko jagāte chale ga.e

koī kitāb apne Thikāne na rah sakī

hindī ko fārsī meñ milāte chale ga.e

aḳhbāroñ kī vo dhajjiyāñ bikhrīñ ki kyā kahūñ

ab in se vo nigāh ke naate chale ga.e

dīvāreñ vo nahīñ rahīñ vo dar nahīñ rahā

jis ghar pe mujh ko naaz thā vo ghar nahīñ rahā

aae miyan ke dost to aate chale gae

chhoTe se ek ghar mein samate chale gae

wo qahqahe lage ki chhaten ghar ki uD gain

buniyaad sare ghar ki hilate chale gae

bakwas un ki sun ke shayatin ro paDe

roya jo ek sab ko rulate chale gae

naukar ne aaj chae ke dariya baha diye

dariya samundaron mein samate chale gae

almariyon mein saham gae biskiTon ke Tan

chun chun ke ek ek ko khate chale gae

khane ki chizen nadir-o-nayab ho gain

dilli ka qatl-e-am machate chale gae

sheron ki tarah TuT paDe aa ke mez par

jo chiz bhi mili wo chabaate chale gae

jaise police-man pakaDta hai chor ko

har shai pakaD ke peT mein late chale gae

engine ki tarah munh se ugalte rahe dhuan

aur sigreTon ki rakh giraate chale gae

har samt phenk phenk ke machis ki tiliyan

kuDe ka farsh ghar mein bichhate chale gae

kamre mein ghumte hue kichaD-bhare wo boot

qalin ke nasib jagate chale gae

diwaron se Tike rahe chupDe hue wo sar

har naqsh-e-ma-siwa ko miTate chale gae

aawazen aaKH thuKH ki hoti rahin buland

soe hue gulon ko jagate chale gae

koi kitab apne Thikane na rah saki

hindi ko farsi mein milate chale gae

aKHbaron ki wo dhajjiyan bikhrin ki kya kahun

ab in se wo nigah ke nate chale gae

diwaren wo nahin rahin wo dar nahin raha

jis ghar pe mujh ko naz tha wo ghar nahin raha