مجھے ووٹ دینا

میں کھوٹا تھا بالکل کھرا ہو گیا ہوں

مجھے ووٹ دینا کھڑا ہو گیا ہوں

مجھے ہو گئی ہے الیکشن کی خارش

مری آپ سے بس یہی ہے گزارش

کریں دوسروں سے بھی میری سفارش

یہی ہے مری انتہائے نگارش

نکما تھا ہاں کام کا ہو گیا ہوں

مجھے ووٹ دینا کھڑا ہو گیا ہوں

وزیروں سے میں آشنائی کروں گا

تمہاری گلی کی صفائی کروں گا

حریفوں کی اپنے پٹائی کروں گا

کچھ اس طرح سے رہنمائی کروں گا

خدا تو نہیں ناخدا ہو گیا ہوں

مجھے ووٹ دینا کھڑا ہو گیا ہوں

نہ ہوگی تمہیں باربر کی بھی حاجت

میں کرتا رہوں گا تمہاری حجامت

ہوں صادق نہیں جھوٹ کی میری عادت

مرے حال پر اب تو کیجے عنایت

میں کل کیا تھا اور آج کیا ہو گیا ہوں

مجھے ووٹ دینا کھڑا ہو گیا ہوں

میں بے پر کی اکثر اڑایا کروں گا

اور آپس میں تم کو لڑایا کروں گا

میں پکڑاؤں گا پھر چھڑایا کروں گا

میں ہر ایک کے کام آیا کروں گا

کہ ہر اک مرض کی دوا ہو گیا ہوں

مجھے ووٹ دینا کھڑا ہو گیا ہوں

اگر ہو گیا کامیاب اللہ اللہ

کروں گا میں تم سے خطاب اللہ اللہ

کھلاؤں گا شامی کباب اللہ اللہ

بنا دوں گا سب کو نواب اللہ اللہ

خدا کی قسم آپ کا ہو گیا ہوں

مجھے ووٹ دینا کھڑا ہو گیا ہوں