mujhe wote dena

maiñ khoTā thā bilkul kharā ho gayā huuñ

mujhe vote denā khaḌā ho gayā huuñ

mujhe ho ga.ī hai election kī ḳhārish

mirī aap se bas yahī hai guzārish

kareñ dūsroñ se bhī merī sifārish

yahī hai mirī intihā-e-nigārish

nikammā thā haañ kaam kā ho gayā huuñ

mujhe vote denā khaḌā ho gayā huuñ

vazīroñ se maiñ āshnā.ī karūñgā

tumhārī galī kī safā.ī karūñgā

harīfoñ kī apne piTā.ī karūñgā

kuchh is tarah se rahnumā.ī karūñgā

ḳhudā to nahīñ nāḳhudā ho gayā huuñ

mujhe vote denā khaḌā ho gayā huuñ

na hogī tumheñ barber kī bhī hājat

maiñ kartā rahūñgā tumhārī hajāmat

huuñ sādiq nahīñ jhuuT kī merī aadat

mire haal par ab to kiije ināyat

maiñ kal kyā thā aur aaj kyā ho gayā huuñ

mujhe vote denā khaḌā ho gayā huuñ

maiñ be-par kī aksar uḌāyā karūñgā

aur aapas meñ tum ko laḌāyā karūñgā

maiñ pakḌā.ūñgā phir chhuḌāyā karūñgā

maiñ har ek ke kaam aayā karūñgā

ki har ik maraz kī davā ho gayā huuñ

mujhe vote denā khaḌā ho gayā huuñ

agar ho gayā kāmyāb allah allāh

karūñgā maiñ tum se ḳhitāb allah allāh

khilā.uñgā shāmī kabāb allah allāh

banā dūñgā sab ko navāb allah allāh

ḳhudā kī qasam aap kā ho gayā huuñ

mujhe vote denā khaḌā ho gayā huuñ

main khoTa tha bilkul khara ho gaya hun

mujhe wote dena khaDa ho gaya hun

mujhe ho gai hai election ki KHarish

meri aap se bas yahi hai guzarish

karen dusron se bhi meri sifarish

yahi hai meri intiha-e-nigarish

nikamma tha han kaam ka ho gaya hun

mujhe wote dena khaDa ho gaya hun

waziron se main aashnai karunga

tumhaari gali ki safai karunga

harifon ki apne piTai karunga

kuchh is tarah se rahnumai karunga

KHuda to nahin naKHuda ho gaya hun

mujhe wote dena khaDa ho gaya hun

na hogi tumhein barber ki bhi hajat

main karta rahunga tumhaari hajamat

hun sadiq nahin jhuT ki meri aadat

mere haal par ab to kije inayat

main kal kya tha aur aaj kya ho gaya hun

mujhe wote dena khaDa ho gaya hun

main be-par ki aksar uDaya karunga

aur aapas mein tum ko laDaya karunga

main pakDaunga phir chhuDaya karunga

main har ek ke kaam aaya karunga

ki har ek maraz ki dawa ho gaya hun

mujhe wote dena khaDa ho gaya hun

agar ho gaya kaamyab allah allah

karunga main tum se KHitab allah allah

khilaunga shami kabab allah allah

bana dunga sab ko nawab allah allah

KHuda ki qasam aap ka ho gaya hun

mujhe wote dena khaDa ho gaya hun