mutton ki samt main baDhta hun tu kabab uTha

mutton kī samt maiñ baḌhtā huuñ tū kabāb uThā

ye lamha-bhar kā tamāshā hai be-hijāb uThā

hamārī zulf-e-siyah kā bharam na khul jaa.e

bachā huā hai jo piyālī meñ vo ḳhizāb uThā

agar hai niiñd na aane kā āriza tujh ko

to bed pe leT ke fauran koī kitāb uThā

tū radio hai zamāne se ab to ban T.v

sadā ke saath hī picture bhī ho naqāb uThā

tarah tarah ke masā.il haiñ āshiqoñ ke liye

kisī bhī 'ahd-e-mohabbat kā tū nisāb uThā

maiñ saañs rok ke baiThā huuñ rahm kar mujh par

abhī jo ek utārī hai vo jurāb uThā

ye lag rahā hai tirī daal ab nahīñ galnī

jo us ke vāste laayā hai vo gulāb uThā

mutton ki samt main baDhta hun tu kabab uTha

ye lamha-bhar ka tamasha hai be-hijab uTha

hamari zulf-e-siyah ka bharam na khul jae

bacha hua hai jo piyali mein wo KHizab uTha

agar hai nind na aane ka aariza tujh ko

to bed pe leT ke fauran koi kitab uTha

tu radio hai zamane se ab to ban Tw

sada ke sath hi picture bhi ho naqab uTha

tarah tarah ke masail hain aashiqon ke liye

kisi bhi 'ahd-e-mohabbat ka tu nisab uTha

main sans rok ke baiTha hun rahm kar mujh par

abhi jo ek utari hai wo jurab uTha

ye lag raha hai teri dal ab nahin galni

jo us ke waste laya hai wo gulab uTha