na hon paise to istiqbaaliyon se kuchh nahin hoga

na hoñ paise to istiqbāliyoñ se kuchh nahīñ hogā

kisī shā.ir ko ḳhālī tāliyoñ se kuchh nahīñ hogā

nikal aa.ī hai un ke peT se phathrī shakar-koTeD

jo kahtī thī ki mīThī chhāliyoñ se kuchh nahīñ hogā

''ḳhudī'' ko bech kar ''shāhīn'' ko bhī zab.h kar Daalā

ham aise zūd-hazm iqbāliyoñ se kuchh nahīñ hogā

vahī hazrāt taqsīm-e-vatan ke asl mujrim haiñ

jo kahte haiñ yahāñ bañgāliyoñ se kuchh nahīñ hogā

abas hai un se ik chiḌiyā ke bachche kī vilādat bhī

ki in fashion-zada ghar-vāliyoñ se kuchh nahīñ hogā

mazā jab hai ki zindoñ ko sunāo naġhma-e-ulfat

kisī kī qabr par qavvāliyoñ se kuchh nahīñ hogā

ye bachchoñ meñ izāfa kar rahe haiñ raat din 'ḳhālid'

opposition ke in haḌtāliyoñ se kuchh nahīñ hogā

na hon paise to istiqbaaliyon se kuchh nahin hoga

kisi shair ko KHali taliyon se kuchh nahin hoga

nikal aai hai un ke peT se phathri shakar-koTeD

jo kahti thi ki miThi chhaaliyon se kuchh nahin hoga

KHudi ko bech kar shahin ko bhi zabh kar Dala

hum aise zud-hazm iqbaaliyon se kuchh nahin hoga

wahi hazraat taqsim-e-watan ke asl mujrim hain

jo kahte hain yahan bangaliyon se kuchh nahin hoga

abas hai un se ek chiDiya ke bachche ki wiladat bhi

ki in fashion-zada ghar-waliyon se kuchh nahin hoga

maza jab hai ki zindon ko sunao naghma-e-ulfat

kisi ki qabr par qawwaliyon se kuchh nahin hoga

ye bachchon mein izafa kar rahe hain raat din 'KHalid'

opposition ke in haDtaliyon se kuchh nahin hoga