paDosi ki murghiyan

america aisā des hai yārān-e-tez-gām

jazbāt to bahut haiñ mohabbat barā-e-nām

sar par sunahre baal, badan dūdh, hoñT jaam

har lab pe i-love hai magar āshiqī harām

allāh hī jaane kaun sī chakkī kā khāte haiñ

sattar baras ke sin meñ bhī āñkheñ laḌāte haiñ

barsīñ badan pe TuuT ke jab bhūrī badliyāñ

īmāñ safed paḌ ga.e jab dekhīñ goriyāñ

haiñ shaiḳh ko pasand paḌosī kī murġhiyāñ

sar par kulāh naaf talak lambī dāḌhiyāñ

chehre to jhurriyoñ se bhare dil javān haiñ

din meñ haiñ shaiḳh raat meñ salmān-ḳhān haiñ

qudrat ke dast-e-nāz kā 'sāġhar' kamāl haiñ

jo ḳhvāb meñ na aa.e vo aisā ḳhayāl haiñ

nīche se le ke Top talak mālā-māl haiñ

chāñdī ke paañv dosto sone ke baal haiñ

jo rañg-rūp un meñ hai vo desī meñ nahīñ

jo pepsi meñ lutf hai vo lassī meñ nahīñ

maḳhmal pe jis ke paañv chileñ vo chale kahāñ

surḳhī-e-pāñ dikhā.ī de aise gale kahāñ

bādal zamīñ pe jhuk ga.e gesū Dhale kahāñ

ġhairoñ meñ husn-o-ishq ke ye silsile kahāñ

saudā mohabbatoñ kā bharā sar-phiroñ meñ hai

us ishq ko salām jo kachche ghaḌoñ meñ hai

america aisa des hai yaran-e-tez-gam

jazbaat to bahut hain mohabbat bara-e-nam

sar par sunahre baal, badan dudh, honT jam

har lab pe i-lowe hai magar aashiqi haram

allah hi jaane kaun si chakki ka khate hain

sattar baras ke sin mein bhi aankhen laDate hain

barsin badan pe TuT ke jab bhuri badliyan

iman safed paD gae jab dekhin goriyan

hain shaiKH ko pasand paDosi ki murghiyan

sar par kulah naf talak lambi daDhiyan

chehre to jhurriyon se bhare dil jawan hain

din mein hain shaiKH raat mein salman-KHan hain

qudrat ke dast-e-naz ka 'saghar' kamal hain

jo KHwab mein na aae wo aisa KHayal hain

niche se le ke Top talak mala-mal hain

chandi ke panw dosto sone ke baal hain

jo rang-rup un mein hai wo desi mein nahin

jo pepsi mein lutf hai wo lassi mein nahin

maKHmal pe jis ke panw chilen wo chale kahan

surKHi-e-pan dikhai de aise gale kahan

baadal zamin pe jhuk gae gesu Dhale kahan

ghairon mein husn-o-ishq ke ye silsile kahan

sauda mohabbaton ka bhara sar-phiron mein hai

us ishq ko salam jo kachche ghaDon mein hai