pahle taam phir kalam

halqa-e-fikr-o-suḳhan ne mujhe izzat baḳhshī

ya.anī mehmān ḳhusūsī kī fazīlat baḳhshī

masnad-e-ālī pe lā kar jo biThāyā mujh ko

qad-e-kotāh ko is taur se rif.at baḳhshī

fā.eda ye bhī huā aaj kī is mahfil meñ

ek duuje se mulāqāt kī sūrat baḳhshī

qābil-e-izzat-o-takrīm ḳhvātīn bhī haiñ

un ke hone ne mirī ruuh ko farhat baḳhshī

puurā dīvān hī mausūf sunā baiThe haiñ

jin ko halqe ne yahāñ aaj nizāmat baḳhshī

tiis battīs se na the kam yahāñ shā.ir imshab

sab ko sunñe kī ḳhudā ne mujhe himmat baḳhshī

kuchh tarannum se sunāne pe musir the ġhazleñ

tahat meñ kuchh ne sunā.eñ ye ri.āyat baḳhshī

dīdanī shā.ir-o-sāme' kī hai sūrat is dam

bhuuk ne saare hī chehroñ ko naqāhat baḳhshī

sadr-e-mahfil kā huuñ mamnūn ki is mahfil meñ

baat apnī bhī kahūñ mujh ko ijāzat baḳhshī

ham ne maanā kā abhī aap ko bhī sunñā hai

masnad-e-ālī ko hazrat ne jo zīnat baḳhshī

aap tashrīf yahāñ laa.e yahī kaafī hai

kis qadar aap ne ham sab ko hai izzat baḳhshī

khānā khulne kā hī elaan agar farmā deñ

ham ye samjheñge ki taqrīr-e-sadārat baḳhshī

halqa-e-fikr-o-suKHan ne mujhe izzat baKHshi

yani mehman KHususi ki fazilat baKHshi

masnad-e-ali pe la kar jo biThaya mujh ko

qad-e-kotah ko is taur se rifat baKHshi

faeda ye bhi hua aaj ki is mahfil mein

ek duje se mulaqat ki surat baKHshi

qabil-e-izzat-o-takrim KHwatin bhi hain

un ke hone ne meri ruh ko farhat baKHshi

pura diwan hi mausuf suna baiThe hain

jin ko halqe ne yahan aaj nizamat baKHshi

tis battis se na the kam yahan shair imshab

sab ko sunne ki KHuda ne mujhe himmat baKHshi

kuchh tarannum se sunane pe musir the ghazlen

tahat mein kuchh ne sunaen ye riayat baKHshi

didani shair-o-same' ki hai surat is dam

bhuk ne sare hi chehron ko naqahat baKHshi

sadr-e-mahfil ka hun mamnun ki is mahfil mein

baat apni bhi kahun mujh ko ijazat baKHshi

hum ne mana ka abhi aap ko bhi sunna hai

masnad-e-ali ko hazrat ne jo zinat baKHshi

aap tashrif yahan lae yahi kafi hai

kis qadar aap ne hum sab ko hai izzat baKHshi

khana khulne ka hi elan agar farma den

hum ye samjhenge ki taqrir-e-sadarat baKHshi